काठमाडौं । भारतको असममा दुई यात्रुबाहक डुंगा आपसमा ठोक्किएका छन् । जोरहट नजिकै ब्रम्हापुत्र नदीमा १२० यात्रु लिएर गएका डुंगा ठोक्किएका हुन् ।
बुधबार साँझ भएको घटनामा कम्तीमा एक महिलाको ज्यान गएको छ । अझै पनि ४ जना बेपत्ता भएको भारतीय संचारमाध्यमहरुले स्थानीय प्रशासनलाई उधृत गर्दै लेखेका छन् ।
घटनापछि ३० जनाले पौडिएर ज्यान जोगाएका थिए । यसमा महिला र बालबालिका पनि सामेल छन् । डुंगामा २५ देखि ३० वटा मोटरसाइकलसमेत रहेका थिए ।
अहिलेसम्म ४२ जनालाई सकुशल उद्धार गरिएको अधिकारीहरुले बताएका छन् । चार जनाको खोजी भइरहेको छ ।
भारतीय प्रधानमन्त्री नरेन्द्र मोदीले दुर्घटनामा परेकाहरुको उद्धार र हराइरहेकाहरुको खोजी तीव्र गतिमा भइरहेको जनाएका छन् ।
गृहमन्त्री अमित शाहले पनि मुखयमन्त्री हिमन्ता विश्व सरमालाई टेलिफोन गरी घटनाबारे जानकारी लिएका छन् ।
सामाजिक संजालमा भिडियोसमेत भाइरल भइरहेको छ । भिडियोमा डुंगा डुबेको र मानिसहरुले छलाङ्ग मारेको देखिएको छ ।
