“कोरोनासँगै जिउन सिकौँ” अभियानको तयारी दक्षिण कोरिया

७० प्रतिशतले पाए कोरोनाभाइरस विरुद्धको पूर्ण खोप

एएनआई,

प्रकाशित २०७८ कार्तिक ६ शनिबार

सोल। दक्षिण कोरियाका ७० प्रतिशतभन्दा बढीले कोरोनाभाइरस विरुद्धको पूर्ण खोप लगाएका छन्। दक्षिण कोरियाली रोग नियन्त्रण तथा न्यूनीकरण प्राधिकरणले शनिवार सार्वजनिक गरेको विवरणमा ७० प्रतिशतभन्दा बढीले दुवै खोप लगाएको उल्लेख गरिएको छ। सरकारी अधिकारीहरूले अर्को हप्तासम्ममा यो सङ्ख्या ८५ प्रतिशतसम्म पुग्न सक्ने जनाएका छन्।

सरकारले महामारी फेरि फैलिन नदिनका लागि सतर्कताका केही उपायहरूलाई अझै पनि निरन्तरता दिने जनाएको छ। कतिपय अवस्थामा “कोरोनासँगै जिउन सिकौँ” भन्ने मान्यतालाई समेत आत्मसाथ गर्न पनि आह्वान गरिएको छ। त्यसका लागि छुट्टै अभियानको तयारी पनि भएको अधिकारीहरूले जनाएका छन्। सरकारले अतिरिक्त खोप लगाउने अभियानलाई पनि प्राथमिकताका साथ अगाडि बढाउने योजना बनाएको पनि अधिकारीहरूको भनाइ छ।

दक्षिण कोरियामा गत फेब्रुअरीदेखि कोरोनाभाइरस विरुद्धको खोप अभियान सुरु भएको हो। सरकारी अधिकारीहरूका अनुसार शनिवार मात्रै पनि दक्षिण कोरियामा थप एक हजार ५०८ जना कोरोनाभाइरसबाट सङ्क्रमित भएका छन्।