काठमाडौं । सत्ता गठबन्धनमा रहेको नेपाल कम्युनिष्ट पार्टी (माओवादी केन्द्र) ले राष्ट्रिय सम्मेलन आउनुअघि प्रदेश २ को पार्टी जिल्ला समन्वय समितिको संयोजक र केही जिल्लामा सहइन्चार्ज तोकेको छ । 

प्रदेशमा रहेको आठवटै जिल्लाको संयोजक तथा दुईवटा जिल्लाको सहइन्चार्ज माओवादी केन्द्र प्रदेश २ समितिको पदाधिकारी बैठकले तोकेको हो । संविधानमा पाँच वर्षभित्र अनिवार्य रुपमा महाधिवेशन वा राष्ट्रिय सम्मेलन गर्नुपर्ने वाध्यात्मक व्यवस्थाअनुसार राष्ट्रिय सम्मेलनको तयारीमा रहको सो पार्टीले प्रदेश २ मा जिल्ला संयोजक टुंग्याएको हो । 

जसअनुसार सप्तरीको संयोजकमा उमेश कुमार यादव, सिरहाको संयोजकमा रामकुमार यादव, धनुषाको संयोजकमा दीपक यादव, महोत्तरीको संयोजकमा तुलसी ढुंगाना, सर्लाहीको संयोजकमा कमल बुढाथोकी, रौतहटको संयोजकमा देवेन्द्र पटेल, बाराको संयोजकमा अनिल श्रेष्ठ र पर्साको संयोजकमा रामदरेश कुशवाहलाई धनुषाको प्रदेश पार्टी कार्यालयमा बसेको पदाधिकारी बैठकले तोकेको हो । 

प्रदेश २ का सहइन्चार्ज विश्वनाथ साहका अनुसार पर्सा जिल्लाको हकमा पूर्व पदाधिकारी (सचिव) इन्चार्ज भएकाले जिल्ला नेतृत्वसँग परामर्श गरी रामदरेश कुशवाहलाई संयोजक तोकिएको हो । वीरगञ्ज महानगरपालिकाको संयोजकमा रहवर अन्सारीलाई तोकेको छ । 

त्यस्तै सर्लाही जिल्लाको सहइन्चार्जमा लोचन धिमाल र रामपृत रायलाई तोकेको छ भने धनुषाको संयोजकत्वमा झल्कु यादवलाई तोकेको छ । अरु जिल्लाको हकमा भने आवश्यकताअनुसार मात्र तोकिने प्रदेश २ का सह इन्चार्ज साहले बताए । 

प्रदेश तथा जिल्ला कमिटीको पूर्णता पार्टीको राष्ट्रिय सम्मेलनबाट दिइनेछ । अहिले पूर्व कमिटीमा रहेका पदाधिकारीहरूलाई सम्मेलन सम्मका लागि जिम्मेवारी तोकिएको उनले बताए । पालिकाको इन्चार्ज तोक्नेबारे सम्बन्धित जिल्लामा रहको केन्द्रीय सदस्य, जिल्ला इन्चार्ज, सह इन्चार्ज र संयोजक लगायतले प्रदेश सदस्यको परामर्श गरी टुङ्ग्याउने निर्णयसमेत भएको छ । 

पार्टी सदस्यले न्यूनतम मासिक लेबी तोक्ने निर्णय पनि गरेको छ । प्रदेश सदस्यले ७५ रुपैयाँ, जिल्ला समन्वय समिति सदस्यले ५० रुपैयाँ, गाउँ नगर समिति सदस्यले २५ रुपैयाँ र त्यो भन्दा तल्लो तहको समिति र आम सदस्यहरूले २० रुपैयाँ मासिक लेबी पार्टीलाई बुझाउनु पर्ने निर्णय गरेको छ ।
 
गत असोजमा बसेको स्थायी समिति बैठकले स्थानीय तह, वडा र टोल सम्मेलनको कार्यतालिका परिवर्तन गरेको थियो । राष्ट्रिय सम्मेलनको कार्यतालिकामा भने कुनै परिवर्तन नगरी राष्ट्रिय सम्मेलन ११ देखि १३ पुससम्म गर्ने तय गरिएको थियो । 

सोहीअनुसार माओवादी केन्द्रले प्रदेश २ को जिल्ला संयोजकहरु टुंग्याएको हो ।