काठमाडौं । सर्बिया आगामी वर्ष कतारमा आयोजना हुने विश्वकप फुटबलमा छानिएको छ । युरोपेली छनोट अन्तर्गत समूह ए को खेलमा पोर्चुगललाई २–१ गोल अन्तरले हराउँदै सर्बिया विश्वकपमा छानिएको हो ।
क्रिष्टियानो रोनाल्डो फ्लप हुँदा पोर्चुगलले घरेलु मैदानमै पराजय भोगेको हो । खेलमा अग्रता पोर्चुगलले लिए पनि त्यसलाई उल्टाउँदै सर्बियाले जित निकाल्यो ।
खेलको दोस्रो मिनेटमै बर्नार्डो सिल्भाको पासमा रेनेटो सान्चेसले गोल गर्दै पोर्चुगललाई शुरुआती अग्रता दिलाएका थिए ।
खेलको ३३ औं मिनेटमा सासा लुकिकको पासमा डुसान टाडिकले गोल गर्दै सर्बियालाई १–१ गोलको बराबरीमा फर्काए ।
खेलको ९० औं मिनेटमा डसानको पासमा एलेक्सजेण्डर मिट्रोभिकले गोल गर्दै सर्बियालाई २–१ ले जिताए ।
खेलमा पोर्चुगल घरेलु मैदानमै स्तब्ध हुन पुग्यो । त्यतिमात्र होइन पोर्चुगलले समूहको शीर्ष स्थानमा रहेर सीधै विश्वकपमा छानिने अवसरसमेत गुमायो ।
पोर्चुगलले यसअघि आयरल्याण्डसँग गोलरहित बराबरी खेलेको थियो ।
जितसँगै समूह ए को शीर्ष स्थानमा रहेर सर्बिया विश्वकपमा छानियो । सर्बियाको ८ खेलमा २० अंक भएको छ ।
पोर्चुगल १७ अंक जोडेर समूहको दोस्रो स्थानमा रहेको छ । पोर्चुगलले प्लेअफ खेलेर विश्वकपमा ठाउँ बनाउन सक्नेछ ।
विश्वकप छनोट हुने सम्भावनाबाट बाहिरिएका लग्जेम्बर्ग र आयरल्याण्डको ९–९ अंक छ । आइतबार रातिको खेलमा आयरल्याण्डले लग्जेम्बर्गलाई ३–० गोल अन्तरले हरायो ।
