-
-
-
-
पोखरा । पोखरा महानगरपालिका वडा नं. १ शंकरटोलस्थित पोखरा व्यवसायिक महिला क्लवले पर्वतमा निःशुल्क आँखा शिविर सम्पन्न गरेको छ ।
पर्वतको ढोरपाटन नगरपालिका वडा नं. १ स्थित बुर्तिबाङ प्राथमिक स्वास्थ्य केन्द्रमा शिविर आयोजना गरिएको हो ।
क्लवले जर्मनीका माईकल बाउर र साथीहरु संगै बाडेन बाडेनको आर्थिक सहयोग र हिमालय आँखा अस्पताल पोखराको प्राविधिक सहयोगमा तीन दिने शिविर सम्पन्न गरेको हो ।
शिविर संचालनका लागि ढोरपाटन नगरपालिका, लायन्स क्लव अफ ढोरपाटन, ढोरपाटन चेम्वर अफ कमर्श र बुर्तिबाङ राइजिङ युथ क्लवले सहयोग गरेको थियो ।
कार्यक्रम संयोजक धनेश्वरी पराजुलीका अनुसार शिविरबाट विद्यालयमा अध्ययन गर्ने विद्यार्थी, स्थानीय र आसपासका नागरिक लाभान्वित भएका थिए ।
शिविरमा ८९२ जनाको आँखा परीक्षण र आवश्यक औषधि वितरण गरिएको थियो ।
आँखा जाँच गरेकामध्ये ७७ जनाको आँखामा जटिल समस्या देखिएपछि अप्रेशन गरिएको संयोजक पराजुलीले जानकारी दिइन् ।
७७ जनामध्ये सात जनाको दुवै आँखाको अप्रेशन गरिएको उनले बताइन् । उनीहरु शिविरमा उपचारपछि आँखा देख्न सफल भएका छन् ।
कार्यक्रममा ढोरपाटन नगरपालिकाका मेयर देबकुमार नेपालीले शिविरबाट नगरवासीले धेरै लाभ लिएको बताए ।
