- सुन चाँदी दर
- विनिमय दर
- नेपाली पात्रो
- राशिफल
काठमाडौं । रगत जम्ने दुर्लभ तर घातक घटनाहरू देखिएका कारण अमेरिकी रोग नियन्त्रण तथा रोकथाम केन्द्र (सीडीसी)ले जोन्सन एण्ड जोन्सन खोपको ठाउँमा फाइजर या मोडर्ना खोप लगाउन सुझाव दिएको छ ।
खोप सम्बन्धी सल्लाहकार समितिमा जोन्सन खोपको बदलामा फाइजर या मोडर्ना लगाउन सुझाव दिने या नदिने विषयमा मतदान हुँदा सर्वसम्मतिले मतदान गरेपछि सीडीसीले यस्तो आग्रह गरेको हो ।
अमेरिकामा थोरै मानिसले जोन्सनको खोप लगाएका छन् । सीडीसीका अनुसार झन्डै २० करोडले पूर्ण खोप लगाउँदा करिब १ करोड ६० लाखले मात्रै जोन्सन खोप लगाएका हुन् ।
सीडीसीको यस्तो निर्देशनपछि जोन्सन एण्ड जोन्सनले एक विज्ञप्ती जारी गर्दै सुरक्षा र स्वस्थता पहिलो प्राथमिकता रहेको भन्दै सीडीसीसँग मिलेर काम गर्ने बताएको छ ।
जोन्सन खोप लगाएपछि रगत जम्ने समस्या यसअघि पनि देखिएको थियो । खास गरी ५० वर्षमुनिका महिलामा बढी जसो यस्तो समस्या देखिने गरेको छ ।
सीडीसीले यस्ता केसहरु पहिला अनुमान गरिए भन्दा बढी देखिन थालेको बताएको छ । अमेरिका यस्ता ५० केसहरु भेटिएको सीडीसीले जनाएको छ । जुन प्रति १० लाख जोन्सन खोप लगाउनेमध्ये ४ जना हुन् ।
जोन्सन खोप लगाएपछि रगत जमेर अमेरिकामा मात्रै ९ जनाको मृत्यु भएको सीडीसीले जनाएको छ । यस्तै समितिका सदस्यहरुले जोन्सन खोप फाइजर र मोडर्नाको तुलनामा कम प्रभावकारी रहेको समेत बताएका छन्।