२०३० मा चीन विश्वको शीर्ष अर्थतन्त्र बन्ने, भारतले अर्को वर्ष फ्रान्स र २०२३ सम्ममा बेलायतलाई उछिन्ने

३० मा जर्मनीले जापानलाई उछिन्ने

हाम्रा कुरा

प्रकाशित २०७८ पुष १३ मंगलबार

काठमाडौं । सन् २०३० मा चीन विश्वको शीर्ष अर्थतन्त्र बन्ने बेलायती कन्सल्टेन्सी साइबरको प्रतिवेदनले देखाएको छ । साइबरको प्रतिवेदन अनुसार सन् २०३० मा डलरको हिसाबले चीन विश्वको शीर्ष अर्थतन्त्र बन्नेछ।

विश्व आर्थिक लीग तालिका प्रतिवेदनले भने सन् २०२८ सम्ममा चीन शीर्ष स्थानमा पुग्ने भविष्यवाणी गरेको थियो। डलरको हिसाबले गर्दा चीनलाई विश्वको शीर्ष अर्थतन्त्र बन्न समय लाग्ने तथ्यलाई पनि यस प्रतिवेदनले सङ्केत गरेको छ। प्रतिवेदन मा भनिएको छ, ' विश्वको आर्थिक उत्पादन सन् २०२२ मा पहिलो पटक १०० खरब डलर नाघेको छ। तर, अमेरिकालाई उछिनेर विश्वको शीर्ष अर्थतन्त्र बन्न चीनलाई केही समय लाग्नेछ।'

गत आइतबार सार्वजनिक गरिएको प्रतिवेदनमा भारतीय अर्थतन्त्रले अर्को वर्ष फ्रान्सलाई उछिन्ने पनि उल्लेख छ । यससँगै भारतीय अर्थतन्त्र फ्रान्सेली र बेलायती अर्थतन्त्रलाई पछाडि छोड्ने तयारीमा रहेको प्रतिवेदनले औँल्याएको छ ।

प्रतिवेदन अनुसार सन् २०२३ सम्ममा भारत विश्वको छैटौँ ठुलो अर्थतन्त्र बन्नेछ । साइबरको प्रतिवेदनमा भनिएको छ, ' सन् २०२३ सम्ममा भारतीय अर्थतन्त्र बेलायतको भन्दा बढी हुनेछ र विश्वको छैटौँ ठुलो अर्थतन्त्रको रूपमा आफ्नो स्थान पुनः प्राप्त गर्नेछ।'

साइबरका उपाध्यक्ष डगलस म्याकविलियम्सले भने, ' २०२० को दशकमा विश्व अर्थतन्त्रले मुद्रास्फीति को सामना गर्नेछ। हाल अमेरिकामा मुद्रास्फीति ६.८ प्रतिशतमा पुगेको छ।'

उनले अगाडि भने, 'अपेक्षाकृत मामूली समायोजनले गैर क्षणिक तत्त्वहरूलाई नियन्त्रणमा ल्याउनेछ। यदि होइन भने, संसारले सन् २०२३/२४ मा मन्दीको लागि आफूलाई तयार गर्नु आवश्यक छ।'

प्रतिवेदनले सन् २०३३ मा आर्थिक उत्पादनको हिसाबले जर्मनीले जापानलाई उछिन्ने पनि देखाएको छ। रुस सन् २०३६ सम्ममा शीर्ष १० अर्थतन्त्र बन्न सक्छ र इन्डोनेसिया सन् २०३४ मा नवौँ स्थानमा पुग्ने बाटोमा देखिन्छ।