सोल । दक्षिण कोरियामा दैनिक संक्रमितको सङ्ख्या बढ्दै गएको छ । कोरीयामा दैनिक संक्रमितको सङ्ख्या अहिलेसम्मकै धेरै पुगेको छ । सरकारी अधिकारीहरुले बुधबार दिएको जानकारीनुसार पछिल्लो एक दिनमा दक्षिण कोरियामा २० हजार २७० जना नयाँ संक्रमित भएका हुन ।
कोरोनाभाइरसको नयाँ भेरियन्टको रुपमा देखिएको ओमिक्रोनको संक्रमण तिव्र रुपमा फैलिएकाले दैनिक संक्रमितको सङ्ख्या अहिलेसम्मकै धेरै भएको जनाइएको छ ।
यसअघि एक दिनमा १८ हजार ३४२ जना कोरोनाभाइरसबाट संक्रमित भएको विवरण सार्वजनिक गरिएको थियो । दैनिक संक्रमितको सङ्ख्या २० हजार नाघेको बुधबार पहिलो पटक हो ।
दक्षिण कोरियामा कोरोनाभाइरसबाट अहिलेसम्म संक्रमितहरुको कुल सङ्ख्या आठ लाख ८४ हजार ३१० पुगेको छ । नयाँ संक्रमित मध्ये चार हजार १८६ जना राजधानी सोलमै भेटिएका हुन । भाइरसको फैलावट ग्रामिण क्षेत्रमा पनि धेरै भएको अधिकारीहरुले जनाएका छन् ।
अहिले संक्रमित अवस्थामै रहेकाहरु मध्ये २७८ जनाको अवस्था गम्भीर रहेको र उनीहरुको उपचार भइरहेको जनाइएको छ ।कोरियामा पछिल्लो एक दिनमा कोरोनाका कारण १५ जनाको मृत्यु भएको छ । योसँगै अहिलेसम्म कुल मृतकको सङ्ख्या छ हजार ७८७ पुगेको छ ।
