काठमाडौं । नेतृ रञ्जु दर्शानाले इंगेजमेन्ट गरेकी छिन् । उनले किशोर कुइकेल (किसु) सँग शुक्रबार इंगेजमेन्ट गरेकी हुन् । दर्शनाले सामाजिक सञ्जालमार्फत् सारा ब्राह्मण्डलाई साक्षी राखेर टीका कार्यक्रम सम्पन्न गरेको जनाएकी छिन् ।
‘आजदेखि जीवनको अर्को एउटा सुन्दर यात्राको शुभारम्भ भएको छ । दियो कलश र गणेश भगवान एवं परिवारका सदस्यहरू, निकट साथीहरु र सारा ब्राह्मण्ड साक्षी राखी फूलमाला, टीका कार्यक्रम सम्पन्न गरेका छौं’, उनले लेखेकी छिन् ।
रञ्जु अगाडि लेख्छिन्, ‘तपाईहरूको आशीर्वाद र शुभकामनाको लागि हृदयदेखि कृतज्ञ ज्ञापन गर्न चाहन्छु । मायाको यात्रामा एक सशक्त जीवनसाथी बनी हरदम साथ दिने मेरो हरेक दिन प्रयास रहने छ किसु । तिम्रो जीवनमा, परिवार मलाई खुला हृदयले स्वागत गरेकोमा धेरै धन्यवाद किसु ।’
रञ्जु २०७४ सालमा भएको स्थानीय तहको निर्वाचनमा काठमाडौं महानगरपालिकाको मेयरमा उठेपछि चर्चामा आएकी थिइन् । उनले त्यतिबेला सम्मानजनक मत पाएकी थिइन् ।
यसपालि पनि हुँदै गरेको स्थानीय तहको चुनाव अगाडि उनको बिहेको कारण चर्चामा आउन पुगेकी छिन् ।
