युक्रेनीहरू तिब्बतको समर्थनमा ताइवानको विरोधसभामा सहभागी

एजेन्सी,

प्रकाशित २०७८ चैत १ मंगलबार

ताइपेई। ताइवानमा रहेका युक्रेनीहरूले शनिबार तिब्बतमा चिनियाँ दमनको विरुद्धमा आयोजना गरिएको विरोध प्रदर्शनलाई समर्थन गर्दै सहभागी भएका छन्।

मार्च १९५९ मा तिब्बती विद्रोह बिरुद्ध चिनियाँ दमनको सम्झनामा सन् २००४ देखि हरेक वर्ष तिब्बतका लागि विरोध मार्च आयोजना गरिन्छ। कम्युनिष्ट चीनको शासन विरुद्ध तिब्बती विद्रोह क्रूर रूपमा दमन हुनुअघि दुई हप्तासम्म विद्रोह चलेको थियो।

शनिबारको मार्चमा सहभागी युक्रेनीहरूले तिब्बतमा चिनियाँ कब्जा र युक्रेनमा जारी रुसी आक्रमणको बीचमा समानता देखेको ताइवान समाचारले रिपोर्ट गरेको छ।

दुई वर्षदेखि ताइवानमा बस्दै आएकी युलिया कोरोलेभाले ६३ वर्षको कब्जामा तिब्बतको अवस्था अझै सुध्रन नसकेको भन्दै आन्दोलनकारीलाई युक्रेनविरुद्धको रुसको युद्धले अझै पनि ठूला देशहरू साना राष्ट्रहरूमा आक्रमण, अपमान र अनादर गर्न इच्छुक रहेको देखाएको बताइन्।

'शक्तिशालीहरूले अरूलाई सम्मान गर्नुपर्छ, र कमजोरहरूलाई अपमान गर्नु हुँदैन,' कोरोलेभाले निरंकुश र तानाशाहहरूलाई हटाउन आह्वान गर्दै भनिन्। युक्रेनीहरुले युद्धको विरोध गर्दै स्वतन्त्र मुलुकमाथिको ज्यादती अन्त्य गरिनुपर्ने बताइन्।

तिब्बतको सांस्कृतिक पहिचानलाई दबाउन चिनियाँहरूले कडा कानुन र नियमहरू लागु गरेको रिपोर्टहरू बीच विरोध प्रदर्शन गरिएको हो। तिब्बतमा चिनियाँ कम्युनिष्ट पार्टी (सीसीपी) का सदस्यहरूका लागि नयाँ आचारसंहिताले पार्टीका सदस्यहरूलाई सार्वजनिक र निजी जीवनमा सबै प्रकारका धार्मिकताबाट स्पष्ट रूपमा निषेध गरेको छ।

यसबाहेक, मार्च १ मा लागू भएको 'इन्टरनेट धार्मिक सूचनात्मक सेवाहरूको प्रशासनमा उपायहरू' नामक नयाँ नियमले सरकारी इजाजतपत्र प्राप्त गर्नेहरू बाहेक सबै विदेशी संस्था र व्यक्तिहरूलाई चीन र तिब्बतमा धार्मिक सामग्री अनलाइनमा राख्‍न र प्रचार गर्न प्रतिबन्ध लगाएको छ।