काठमाडौं । फिफा विश्वकप छनोट अन्तर्गत दक्षिण अमेरिकी छनोटमा लियोनल मेस्सीको गोलले अर्जेन्टिनाले सहज जित निकालेको छ । शनिबार बिहान भएको खेलमा अर्जेन्टिनाले भेनेजुएलालाई ३–० गोल अन्तरले हराएको हो ।
अर्जेन्टिनालाई जित दिलाउन मेस्सीसँगै निकोलस गोन्जालेज र एन्जल डी मारियाले एक एक गोल गरे । खेलको ३५ औं मिनेटमा गोन्जालेजले गोल गर्दै अर्जेन्टिनालाई शुरुआती अग्रता दिलाएका थिए ।
७९ औं मिनेटमा मारियाले गोल गर्दै टोलीको अग्रता दोब्बर बनाए । ८२ औं मिनेटमा कप्तान मेस्सीले गोल गर्दै अर्जेन्टिनालाई ३–० को जित दिलाए ।
यस जितसँगै अर्जेन्टिनाले १६ खेल ३८ अंक जोडेको छ । सन् २०२२ को कतार विश्वकपमा यसअघि नै छनोट भइसकेको अर्जेन्टिना तालिकाको दोस्रो स्थानमा रहेको छ ।
भेनेजुएला १० अंक जोडेर पुछारमा रहेको छ । भेनेजुएला बाहिरिइसकेको छ । यो समूहबाट शीर्ष स्थानको ब्रजिलको ४२ अंक छ । यो समूहबाट तेस्रो स्थानको इक्वेडर र चौथो स्थानको उरुग्वे समान २५ अंकसहित एक खेलअघि नै विश्वकपमा छानिएका छन् ।
अब एक टिम छानिनु पर्नेछ । पेरु, कोलम्बिया र चिलीमध्ये एक टिम विश्वकपमा पुग्नेछ । तीन वटै टिमले अन्तिम खेल खेल्न बाँकी छ ।
