ललितपुरमा उज्ज्वल कृष्ण बने विवेकशील साझाका तर्फबाट मेयरका उम्मेदवार

हाम्रा कुरा

प्रकाशित २०७९ वैशाख ६ मंगलबार

ललितपुर। विवेकशील साझा पार्टीले ललितपुर महानगरपालिकामा उज्ज्वल कृष्ण श्रेष्ठलाई मेयरको उम्मेदवारका रूपमा अघि सारेको छ।

मंगलबार पाटन कृष्ण मन्दिरसँगै भीमसेन स्थानमा आयोजित एक कार्यक्रममा श्रेष्ठको उम्मेदवारी घोषणा भएको हो।

पार्टीको बागमती प्रदेशका संयोजक समेत रहेका श्रेष्ठले उम्मेदवारी घोषणा पूर्व नवनिर्मित भीमसेनको मन्दिर दर्शन गरि भ्रष्टाचार नगर्ने र गर्न नदिने कसम खाएका छन्।

ललितपुर महानगर र पाटनको ऐतिहासिक वैभवलाई कायम गर्दै विकास निर्माण गर्ने तथा शिक्षा स्वास्थ्य जस्ता आधारभूत सेवा सुविधालाई निःशुल्क र गुणस्तरीय बनाउने आफ्ना एजेन्डा रहेको श्रेष्ठले योजना अघि सारे।

सबै पार्टीहरूले ठुला ठुला सपना देखाएर पूरा नगरेको स्मरण गर्दै श्रेष्ठले भने, 'मैले गर्नै नसकिने ठुला ठुला सपना देखाउँदिन। तर म जे सक्छु त्यो इमानदारीपूर्वक गर्छु। इमानदारी मेरो पहिलो सर्त हो ।'

कार्यक्रममा विवेकशील साझा पार्टीका अध्यक्ष रवीन्द्र मिश्रले साझा पार्टीले ललितपुर महानगरपालिकाको नेतृत्व गर्न पाए शिक्षा, स्वास्थ्यलाई निःशुल्क र गुणस्तरीय बनाउनुका साथै पाटनको सभ्यतालाई जगेर्ना गर्न सम्पदा आसपासका हरेक घरलाई नेवा: सभ्यता अनुसारका बनाउन अनुदान दिने अध्यक्ष घोषणा गरे।

घोषणा सभामा पार्टीका नेता एवं बागमती प्रदेश सांसद शोभा शाक्यले ललितपुर महानगरमा थुप्रै पटक पुराना पार्टीले नेतृत्व गरे पनि जनताको जीवनस्तर र शहरको गौरव बढाउन नसकेको दाबी गर्दै एक पटक विवेकशील साझा पार्टीलाई मौका दिनुपर्ने विचार राखिन्।

अघिल्लो स्थानीय निर्वाचनमा तत्कालीन साझा पार्टीको समर्थनमा उम्मेदवार रहेका रमेश महर्जन तेस्रो र उपमेयरका उम्मेदवार शोभा शाक्य उपविजेता भएका थिए।