काठमाडौं । इजरायलले सोमबार रुसी विदेशमन्त्री सर्गेई लाभरोभले नाजी नेता एडोल्फ हिटलरको यहुदी जरा रहेको भन्ने किसिमले गरेको टिप्पणीको निन्दा गरेको छ। यति मात्रै नभएर इजरायलका लागि रुसी राजदूतलाई इजरायलका विदेशमन्त्री यायर ल्यापिडले 'कडा वार्ता'का लागि बोलाएका छन् ।
ल्यापिडले वाईनेट समाचार वेबसाइटलाई भनेका छन्, 'यो एक अक्षम्य, निन्दनीय कथन हो, एक भयानक ऐतिहासिक गल्ती हो, र हामी माफीको अपेक्षा गर्दछौँ।'
रुसले युक्रेनमाथि गरेको आक्रमणलाई राष्ट्रपति भ्लादिमिर पुटिनले असैनिकीकरण गर्नका लागि भएको विशेष सैन्य अभियान भनेको छ ।
लाभरोभको टिप्पणीलाई वास्तविक नाजीवादका पीडितहरूका लागि अपमान र गहिरो प्रहार भएको बताउँदै प्रलयमा मारिएका ६० लाख यहुदीहरूको सम्झनामा रहेको इजरायलको स्मारक याड वासेमका अध्यक्ष ड्यानी दयानले रुसी विदेशमन्त्रीले षडयन्त्र सिद्धान्त फैलाइरहेको बताएका छन् ।
लाभ्रोभले एक इटालियन दोभाषेलाई भनेका थिए, 'यदि उनीहरूले हामी यहुदी हौँ र यो कस्तो प्रकारको नाजिफिकेसन हो भन्छन् भने, मलाई लाग्छ कि हिटलरको पनि यहुदी मूल थियो, त्यसैले यसको कुनै मतलब छैन।'
'लामो समयदेखि हामीले बुद्धिमान् यहुदीहरूले भनेको सुन्दै आएका छौं कि सबैभन्दा ठूलो एन्टि-सेन्मिट (यहुदी विरोधी)हरू यहुदीहरू आफैँ हुन्,' उनले थपे।
इजरायलले रुस र युक्रेनबीच तटस्थ स्थिति खडा गर्न खोजेको बेला यस टिप्पणीले दुई देशबीचको सम्बन्धमा ठूलो गिरावट ल्याउन सक्ने विदेशी मामिलाका जानकारहरूको भनाइ छ ।
दोस्रो विश्वयुद्धमा करिब २ करोड ७० लाख नागरिक मारिएको सहने सोभियत सङ्घले नाजी जर्मनीलाई पराजित गर्न मद्दत गरेको थियो । मस्कोले आफूलाई मुक्तिदाताको रूपमा चित्रण गर्ने प्रयास गरेको कुरा समेत यसले सङ्केत गरेको बताइएको छ ।
