विजय जुलुसको मिनी ट्रक दुर्घटना हुँदा २४ घाइते, पाँच जना गम्भीर

नारायण वली,

प्रकाशित २०७९ जेठ ४ बुधबार

रुपन्देही । विजय जुलुसमा सहभागी भएकाहरु दुर्घटनामा परेर घाइते भएका छन् । रुपन्देहीको सिद्धार्थनगर १० मा मिनी ट्रक दुर्घटना हुँदा २४ जना घाइते भएका हुन् । विजय जुलुसमा प्रयोग भएको गाडी दुर्घटना हुँदा २४ जना घाइते भएका हुन् ।

मतगणनास्थलबाट एमालेको विजय जुलुससँगै निस्किएको गाडी सिद्धार्थनगर–१० को शंकरपुरमा लु १ ख ८०७८ नम्बरको मिनी ट्रक दुर्घटनामा परेको रुपन्देही प्रहरीले जनाएको छ ।

मिनी ट्रक अनियन्त्रित भएर पल्टिएको जिल्ला ट्राफिक प्रहरी कार्यालय रुपन्देही केशव केसीले जानकारी दिए । घाइतेहरुको भैरहवास्थित युनिभर्सल मेडिकल कलेजमा उपचार भइरहेको छ । घाइतेमध्ये ५ को अवस्था गम्भीर रहेको जनाइएको छ भने दर्जनभन्दा बढी घाइते भएको ट्राफिक प्रहरी केसीले बताए ।

भैरहवाको सिद्धार्थनगर १० बाट नेकपा एमालेका उम्मेदवार सुर्जमन यादव अहिर विजयी भएका छन् । उनी एक हजार एक मत ल्याएर विजयी बनेका हुन् । उनकै विजय जुलुसमा प्रयोग भएको गाडी दुर्घटना भएको हो ।