काठमाडौं । रुसको विदेश मन्त्रालयले विवादित दक्षिणी कुरिल टापुहरुमा जापानी मछुवाहरुलाई माछा मार्न दिने अनुमतिसहितको सम्झौता निलम्बन गर्ने बताएको छ । सम्झौता अन्तर्गत आवश्यक भुक्तानी गर्न टोकियो असफल भएको आरोप लगाउँदै रुसले जापानलाई सो टापुमा माछा मार्न नदिने बताएको हो ।
'वर्तमान अवस्थामा, हामी जापानी पक्षले आफ्नो सबै वित्तीय दायित्व पूरा नगरेसम्म १९९८ को सम्झौताको कार्यान्वयन स्थगित गर्न बाध्य छौं,' रुसी विदेश मन्त्रालयकी प्रवक्ता मारिया जाखारोभाले मंगलबार एक विज्ञप्ति जारी गर्दै भनेकी छिन् ।
रूसले कुरिल र जापानले उत्तरी क्षेत्र भन्ने ज्वालामुखी टापुहरूको स्ट्रिङ दुई देशहरू बीचको दशकौं लामो विवादको केन्द्र हो । यी नै टापुहरुको विवादको विषयले यी देशहरुलाई दोस्रो विश्व युद्धको औपचारिक शान्ति सन्धिमा हस्ताक्षर गर्नबाट रोकेको थियो ।
मास्कोले ओखोत्स्क र प्रशान्त महासागरको समुद्रलाई छुट्याउने रणनीतिक द्वीप समूहलाई आफ्नै ठान्छ, जबकि टोकियोले चारवटा टापुहरू जापानको भएको र युद्धको अन्तिम दिनमा सोभियत सेनाले कब्जा गरेको बताउँदै आएको छ ।
गत अक्टोबरमा जापानका नयाँ प्रधानमन्त्री फुमियो किशिदाले जापानको सार्वभौमसत्ता यी चार टापुहरूसम्म फैलिएको बताएका थिए ।
इटुरुप, कुनासिर, शिकोटान र हाबोमाई टापुहरु जापानको उत्तरी होक्काइडो टापुहरूबाट केही किलोमिटर टाढा रहेका छन् । क्रेमलिनले उक्त दाबीको निन्दा गरेको थियो ।
