काठमाडौं । सरकारले ल्याएको अग्निपथ योजनाको विरोधमा आज भारत बन्दको आह्वान गरिएको छ । बन्दको पूर्वसन्ध्यामा सोमबार बिहान धेरै राज्यहरूमा प्रहरीले उच्च सर्तकता अप्नाएको छ । 

अग्निपथ योजनाको विरोधमा विशेषतः युवाहरू क्रुद्ध बनेका छन् । सरकारले अन्याय र अव्यवहारिक योजना ल्याएकाले त्यो फिर्ता हुनुपर्ने उनीहरूले माग गर्दै आएका छन् । 

हालै सरकारले ल्याएको उक्त योजनामा भारतका १७ देखि साढे २१ वर्ष उमेर समूहका युवा–युवतीहरूलाई जल, स्थल र वायु गरी तीन ओटै सैन्य सेवामा जवान पदमा चार वर्षको अल्पकालीन करारमा भर्ना गरिने उल्लेख छ । 

योजनाअनुसार सैनिक सेवामा प्रवेश गरेका ७५ प्रतिशत युवाले चार वर्षमै अवकास पाउने छन् । योजनालाई लिएर केही दिनदेखि भारतमा हिंसात्मक प्रदर्शन भइरहेका छन् । 

युवाहरूको विरोधबीच सरकारले योजना फिर्ता नगर्ने बताउँदै आएको छ । रक्षा खर्च कटौती गर्ने बाहनामा सरकारले लाखौँ युवाको अवसर खोसेको आन्दोलनकारीले बताउँदै आएका छन् । 

सरकारले ल्याएको योजनाको विरोधमा आन्दोलनकारीले दर्जनौँ सवारी साधन र रेलमा आगजनी गरेका छन् । त्यस्तै, करोडौँ मूल्य बराबरको भौतिक सम्पत्तिमा क्षति पुर्याएका छन् । 

बिहारमा २५० रेलले आफ्नो सेवा रद्द गरेका छन् । आन्दोलनकारीले बिहारमा रेललाई निशाना बनाउँदै आएका छन् । बिहार सरकारले अतिसंवेदनशील मानिने पार्टी कार्यालयहरूमा सुरक्षा बढाएको छ । हालसम्म २० जिल्लामा इन्टरनेट सेवा बन्द छ ।  केरला प्रहरीले आफ्नो सम्पूर्ण बल आज हिंसा नियन्त्रणमा लगाउने जनाएको छ । 

प्रेस ट्रस्ट अफ इन्डियाका अनुसार झारखण्डमा सोमबार स्कूलहरू बन्द गरिएका छन् । त्यहाँ कक्षा ९ र ११ को चलिरहेको परीक्षा पनि स्थगित गरिएका छन् । 

दिल्ली नजिकैको गौतम बुद्ध नगरमा ठूला जमघटहरूमा प्रतिबन्ध लगाउने निषेध आदेश लगाइएको छ । विभिन्न राज्यबाट दर्जनौँ आन्दोलनकारी पक्राउ परेका छन् । 

अग्निपथ बन्द हुँदैन 
अग्निपथ कार्यक्रम फिर्ता नहुने भारतीय सरकारले जनाएको छ । उसले आफ्नो कामसमेत थालिसकेको जनाएको छ । रक्षा मन्त्रालयले जतिसुकै विरोध र प्रदर्शन भए पनि यो फिर्ता नहुने जनाएको हो । 

प्रदर्शनका नाममा जो तोडफोडमा संलग्न हुन्छ ऊ अग्निवीर बन्न नपाउनेसमेत घोषणा गरिसकेको छ । 

एयरफोर्सले भर्तीको नोटिससमेत जारी गरिसकेको छ । उसले भर्तीको गाइडलाइन जारी गरेको हो । जसमा चार वर्ष काम नगरी जागिर छाड्न नपाइने र वर्षको तीन दिन छुट्टी लिन पाउनेसमेत नियम रहेको छ । 

अग्निवीरमा साढे १७ वर्षदेखि २१ वर्षका युवाले फिजिकल फिटनेस र शैक्षिक योग्यताका आधारमा भती हुन पाउने छन् । 

अग्निवीरलाई जुनसुकै काममा खटाउन सकिने छ । १८ वर्षभन्दा कम उमेरकाले अभिभावकको स्वीकृति लिन जरुरी छ ।