चिनियाँ सैन्य अभ्यास आक्रमण योजनाको हिस्सा हो- ताइवान

हाम्रा कुरा

प्रकाशित २०७९ साउन २४ मंगलबार

काठमाडौं । ताइवानका विदेशमन्त्रीले चीनले अमेरिकी प्रतिनिधि सभाकी सभामुख न्यान्सी पेलोसीको भ्रमणको विरोधमा गरेको सैन्य अभ्यास स्वशासित टापुमा आक्रमण गर्ने योजनाको एक हिस्सा भएको बताएका छन् । ताइपेईमा पत्रकार सम्मेलनमा बोल्दै विदेशमन्त्री जोसेफ वूले ताइवानमा सम्भावित आक्रमणको लागि कुनै समय नतोके पनि चीनले शुरु गरेको सैन्य अभ्यास आक्रमणको लागि गेम प्लान भएको बताएका हुन् ।

उनले ताइवान स्ट्रेटमा अनौपचारिकरुपमा (ताइवान र चीनलाई छुट्याउने) मध्य रेखा उल्लङ्घन गर्दै चीनले सैन्य अभ्यास जारी राखे पनि ताइवान नडराउने बताएका छन् ।

'चीनले आफ्नो सैन्य प्ले-बुकमा अभ्यासलाई ताइवानमाथि आक्रमणको तयारी गर्न प्रयोग गरेको छ,' वुले भनेका छन् ।

'ताइवानमा सार्वजनिक मनोबल कमजोर पार्ने प्रयासमा यसले ठूलो मात्रामा सैन्य अभ्यास र मिसाइल प्रक्षेपण गर्नुका साथै साइबर आक्रमण, विकृति र आर्थिक जबरजस्ती सञ्चालन गरिरहेको छ। अभ्यास समाप्त भएपछि, चीनले ताइवान स्ट्रेटमा लामो समयसम्म यथास्थितिलाई सामप्त पार्ने प्रयासमा आफ्नो कार्यलाई नियमित गर्ने प्रयास गर्न सक्छ,' वुले अघि भनेका छन् ।

'यस्ता चालहरूले क्षेत्रीय सुरक्षालाई खतरामा पारेको छ र ताइवानभन्दा बाहिर चीनको भूरणनीतिक महत्वाकांक्षाको स्पष्ट छवि दर्शाएको छ,' उनले भने।

यस्तै ताइवानी विदेश मन्त्री वुले चीनलाई प्रभावकारी रूपमा स्ट्रेट नियन्त्रण गर्नबाट रोक्नको लागि ठूलो अन्तर्राष्ट्रिय समर्थनको आग्रह गरेका छन् ।

पेन्टागनका एक अधिकारीले सोमबार वाशिंगटन आफ्नो मूल्याङ्कनमा अडिग रहेको बताउँदै चीनले आगामी दुई वर्षसम्म ताइवानमाथि आक्रमण गर्ने प्रयास नगर्ने बताएका छन् ।