अमेरिकी सांसद ताइवान पुगेपछि चीनले फेरि थाल्यो सैन्य अभ्यास

हाम्रा कुरा

प्रकाशित २०७९ साउन ३० सोमबार

काठमाडौं । चीनले सोमबार ताइवान वरिपरि नयाँ सैन्य अभ्यासको घोषणा गरेको छ । आइतबार ताइवान पुगेको अमेरिकी सांसदहरूको प्रतिनिधिमण्डलले यस क्षेत्रमा बढ्दो तनावकाबीच ताइवानी अधिकारीहरूसँग भेट गरेको बेला बेइजिङले फेरि सैन्य अभ्यासको घोषणा गरेको हो ।

ताइवानमा बढ्दो अमेरिकी सक्रियतालाई बेइजिङले सस्तो राजनीतिक दाउ खेलेको भनेको छ । म्यासाचुसेट्सका डेमोक्र्याटिक सेन एड मार्केलेको नेतृत्वमा कांग्रेसका पाँच सदस्यहरूको प्रतिनिधिमण्डलले एशियाको ठूलो भ्रमणको एक भागको रूपमा ताइपेईमा आइतबार रातभरको रोकावटपछि राष्ट्रपति साई इङ्ग वेनसँग भेट्ने अपेक्षा गरिएको थियो।

ताइवानस्थित अमेरिकी संस्थानले स्थानीय समय अनुसार सोमबार दिउँसोसम्म हुने भनिएको उक्त भेटवार्ताको विवरण सार्वजनिक गरेको भने थिएन ।

सोमबार पत्रकार सम्मेलनमा बोल्दै चिनियाँ विदेश मन्त्रालयका प्रवक्ता वाङ वेनबिनले ताइवानमा पृथकतावादी शक्तिहरूतर्फ गम्भीर रूपमा गलत संकेत पठाएको भन्दै प्रतिनिधिमण्डलको आलोचना गरेका छन् ।

'चीनले राष्ट्रिय सार्वभौमसत्ता र क्षेत्रीय अखण्डताको रक्षा गर्न दृढ र प्रभावकारी कदम चाल्नेछ,' उनले भने ।

सोमबार बेइजिङको प्रतिक्रिया दुई हप्ताअघि सभामुख न्यान्सी पेलोसीको भ्रमणको प्रतिक्रिया भन्दा कम आक्रामक थियो ।

तर, सोमबार दिउँसो पीपुल्स लिबरेसन आर्मी (पीएलए)को पूर्वी थिएटर कमाण्डले ताइवान नजिकै सेनाका धेरै शाखाहरू समावेश गर्ने गरी अभ्यासको घोषणा गरेको छ ।

चीनको रक्षा मन्त्रालयले एक विज्ञप्तिमा अमेरिकी सांसदहरूको पछिल्लो भ्रमणले संयुक्त राज्य अमेरिका ताइवान जलडमरूमा शान्ति र स्थिरताको आन्दोलक र भङ्ग गर्ने किसिमले देखा परेको बताएको छ ।