गुल्मीबाट उठ्ने कुरालाई लिएर झाँक्रीले भनिन्- चित्त दुखाउने काम राम्रो हुन्न
हाम्रा कुरा
प्रकाशित २०७९ भदौ ६ सोमबार
1.4k
Shares
काठमाडौं । नेकपा एकीकृत समाजवादी नेतृ रामकुमारी झाँक्रीले आफू प्रतिनिधि सभा निर्वाचनमा उम्मेदवार बन्ने कुरा हाल निश्चित भई नसकेको बताएकी छन् । केही सञ्चारमाध्यमहरूले झाँक्री निर्वाचनमा गुल्मी २ बाट उम्मेदवारी बन्ने भनेपछि प्रतिक्रिया आएको हो ।
फेसबुको भेरिफाइड एकाउण्टमा उनले आफूबिरुद्ध कपोकल्पित र अनुमानित समाचार लेखेर आफन्त र शुभचिन्तकको चित्त दुखाउने काम गर्नु राम्रो नहुने बताएकी छन् ।
उनले लेखेकी छन्,' म गुल्मीमा छु। तीन दिने पार्टी प्रशिक्षण तम्घासमा सञ्चालनमा छ। हाम्रो पार्टीको आन्तरिक सैद्धान्तिक प्रशिक्षणमा पत्रकारलाई प्रवेश छैन। बाहिर बसेर कपोकल्पित पत्रकारिता गर्नु भएन। न मैले कहीँ कतै फलानो पार्टीको विरासत भत्काउँछु भनेको छु, न फलानोलाई हराउँछु भनेको छु। न म फलानो निर्वाचन क्षेत्रबाट उम्मेदवार हुन्छु भनेको छु। यस्ता कपोकल्पित र अनुमानित समाचार लेखेर मेरा आफ्ना अभिभावक, आफन्त र शुभचिन्तकको चित्त दुखाउने काम गर्नु किमार्थ पनि राम्रो हुन्न।'
एमाले सचिव गोकर्ण विष्ट गुल्मी २ बाट २०७४ आमनिर्वाचनमा विजयी भएका थिए । सो स्थानमा विष्ट र झाँक्रीबीच प्रतिस्पर्धा हुन सक्छ । झाँक्रीले गठबन्धनको तर्फबाट आफू उम्मेदवार बन्ने कुरा सत्य रहे पनि त्यसको प्रक्रिया नै शुरु नभएको बताएकी छन् ।
उनले लेखेकी छन् .' म हाम्रो समाजवादी पार्टीमा गठबन्धनको तर्फबाट उम्मेदवार बन्ने कुरा सत्य हो। तर कहाँ, कहिले,कसरी, भन्ने सबै प्रक्रिया सुरु नै भएको छैन। अब क्रमशः सुरु हुनेछ।'
