काठमाडौं । पाँच दलीय सत्ता गठबन्धनको बैठक आज प्रधानमन्त्रीको सरकारी निवास बालुवाटारमा बस्ने भएको छ । सिट बाँडफाँटका लागि सत्ता गठबन्धनको बैठक बालुवाटारमा बोलाइएको हो ।
बुधवार बस्ने भनिएको गठबन्धनको बैठक स्थगित भएपछि आजलाई सारिएको हो । कार्यदलका संयोजक कृष्णप्रसाद सिटौला कोरोना सङ्क्रमण भएपछि सिट बाँडफाँटमा अझ अप्ठेरो परेको छ ।
सिट बाँडफाँटका लागि आज बिहान ९ बजे गठबन्धनका शीर्ष नेताहरूसहित कार्यदलका सदस्यको बैठक बस्दै छ ।
लामो समयदेखि गठबन्धनको बैठकमा सिट सङ्ख्यामा कुरा नमिल्दा बाँडफाँट हुन सकेको छैन । सबै दल आ-आफ्नै अडानमा रहेका कारण अहिलेसम्म बैठक मात्रै बसेको तर कार्य विभाजन र सिट बाँडफाँट हुन सकेको छैन ।
