निजी क्षेत्रको विकास मुलुकको समृद्धिसँग जोडिएको छ : वरिष्ठ उपाध्यक्ष ढकाल

हाम्रा कुरा

प्रकाशित २०७९ भदौ २४ शुक्रबार

काठमाडौँ। नेपाल उद्योग वाणिज्य महासङ्घका वरिष्ठ उपाध्यक्ष चन्द्रप्रसाद ढकालले निजी क्षेत्रले गरेको व्यावसायिक प्रगतिलाई राज्यले सकारात्मक रूपमा लिनुपर्ने बताएका छन्। ललितपुर उद्योग वाणिज्य सङ्घको ४३औँ वार्षिक साधारण सभालाई बिहीबार सम्बोधन गर्दै वरिष्ठ उपाध्यक्ष ढकालले निजी क्षेत्रले व्यावसायिक प्रगति गर्दा समग्र मुलुकको आर्थिक विकास र समृद्धि मा सहयोग पुग्ने बताउँदै यसलाई राज्यले सकारात्मक रूपमा लिनुपर्ने बताए।

निजी क्षेत्रले तिर्ने राजश्व र करबाट राज्यले पूर्वाधार निर्माण र आर्थिक गतिविधि विस्तार गर्ने गरेको बताउँदै उनले यदि निजी क्षेत्रले व्यवसायबाट नाफा आर्जन गर्छ भने त्यो रकम उसले नयाँ उद्योग व्यवसाय सुरुवात गर्ने, थप रोजगारी सृजना गर्ने र पूर्वाधार निर्माण गर्ने काममै लगाउने हुँदा यसलाई सकारात्मक रूपमा लिन आग्रह गरे।

“नेपालको सन्दर्भमा निजी क्षेत्र मुलुकको अर्थतन्त्रमा ७० प्रतिशतभन्दा बढी योगदान गर्ने क्षेत्र हो। यसले रोजगारी सृजना गरेको छ। सरकारलाई राजश्वमा योगदान गरेको छ र समग्र आर्थिक समृद्धिमा यसको ठूलो योगदान छ,” उनले भने, “त्यसैले राज्यले निजी क्षेत्रलाई हेर्ने दृष्टिकोण सकारात्मक बनाउनुपर्ने हुन्छ। राज्यले निजी क्षेत्रलाई थप विकास र विस्तारका लागि सहजीकरण गर्नुपर्ने हुन्छ।”

निजी क्षेत्रप्रति राज्यको दृष्टिकोणबाट आम मानिसको धारणा बन्ने बताउँदै तीन तहको सरकारबाट आवश्यक सहजीकरण मात्र हुन सकेमा पनि निजी क्षेत्रले छोटो समयमै मुलुकको आर्थिक विकास र समृद्धिको लागि धेरै काम गर्न सक्ने बताए।

ललितपुर उद्योग वाणिज्य सङ्घले नेपालको उद्योग वाणिज्य क्षेत्रको विस्तारमा पुर्‍याएको योगदानको चर्चा गर्दै वरिष्ठ उपाध्यक्ष ढकालले आगामी दिनमा महासङ्घले ललितपुर उद्योग वाणिज्य सङ्घसँग थप सहकार्य गरेर अगाडि बढ्ने प्रतिबद्धता समेत व्यक्त गरे।