पुटिनले युद्धमा मान्छे पठाएपछि चीनद्वारा ‘वार्तामार्फत युद्धविराम’ गर्न आह्वान

हाम्रा कुरा

प्रकाशित २०७९ असोज ६ बिहिबार

काठमाडौं । रुसी राष्ट्रपति भ्लादिमिर पुटिनले युक्रेनमा जारी युद्धका बीच आंशिक सैन्य परिचालनको घोषणा गरेपछि चीनले 'वार्ताद्वारा युद्धविराम' गर्न आह्वान गरेको छ।

चीनको विदेश मन्त्रालयका प्रवक्ता वाङ वेनबिनले बुधबार नियमित पत्रकार सम्मेलनमा बोल्दै भनेका छन्,'हामी सम्बन्धित पक्षहरूलाई वार्ता र परामर्शद्वारा युद्ध विरामको अनुभूति गर्न र सबै पक्षहरूको वैध सुरक्षा चासोको सकेसम्म चाँडो समाधान खोज्न आह्वान गर्दछौं।'

'सबै देशको सार्वभौमसत्ता र भौगोलिक अखण्डताको सम्मान गरिनुपर्छ, संयुक्त राष्ट्र संघको बडापत्रका उद्देश्य र सिद्धान्तहरू पालना गरिनुपर्छ, सबै देशको वैधानिक सुरक्षा चासोलाई गम्भीरतापूर्वक लिइनुपर्छ र शान्तिपूर्ण समाधानका लागि सबै प्रयासहरू अनुकूल हुनुपर्छ भनी हामी सधैँ जोड दिन्छौं। सङ्कटको समर्थन गर्नुपर्छ,' उनले अघि भनेका छन् ।

युक्रेनको मास्को नियन्त्रित क्षेत्रहरूले रुसमा सम्मेलित हुन जनमत सङ्ग्रहको घोषणा गरेपछि पुटिनले बुधवार रुसी क्षेत्रको रक्षा गर्न सबै उपलब्ध साधनहरू प्रयोग गर्ने वाचा गर्दै नागरिकलाई युद्धमा परिचालन गर्ने घोषणा गरेका थिए ।

गत हप्ता चीनको विदेश मन्त्रालयकी प्रवक्ता माओ निङले पनि वार्तामार्फत युद्धविराम गर्न आह्वान गरेकी थिइन्। 'हामी सरोकारवाला पक्षहरूलाई वार्ताबाट युद्धविराम गर्न आह्वान गर्छौं र जतिसक्दो चाँडो सरोकारवाला सबै पक्षको जायज सुरक्षा चासोलाई मिलाउने बाटो खोज्न आग्रह गर्छाैं। साथै, हामी आशा गर्छौं कि अन्तर्राष्ट्रिय समुदायले त्यसका लागि परिस्थिति र ठाउँ सिर्जना गर्नेछ।'

चीनले रुसको कार्यको निन्दा गर्न अस्वीकार गरेको छ, तर उसले युक्रेनको सम्बन्धमा सबै देशको सार्वभौमसत्तालाई समर्थन गर्न बारम्बार भनेको छ।