काठमाडौं । वरिष्ठ रूसी सैन्य अधिकारीहरूले हालै युक्रेनी युद्धमा रणनीतिक आणविक हतियारहरू प्रयोग गर्ने सम्भावनाबारे छलफल गरेको खुलासा भएको छ ।
अमेरिकी सञ्चार माध्यमले राष्ट्रिय खुफिया परिषद् (एनआईसी)द्वारा तयार मस्यौदामा उल्लेखित मूल्याङ्कनलाई उद्धृत गर्दै यो विषय सार्वजनिक गरेका छन् ।
यद्यपि आणविक हतियारको प्रयोगबारेको सो वार्तामा रुसी राष्ट्रपति भ्लादिमिर पुटिन सहभागी नभएको अमेरिकी गुप्तचर निकायले गरेको मूल्याङ्कनले जनाएको छ।
न्यूयोर्क टाइम्स (एनवाईटी)का अनुसार यो जानकारीले अक्टोबरको मध्यमा अमेरिकी सरकार भित्र हल्ला फैलिएको थियो ।
रणनीतिक आणविक हतियारहरू लडाइँमा छोटो दायराहरूमा प्रयोग गर्नको लागि बनाइएका हतियार हुन् ।
रुससँग करिब दुई हजार सामरिक आणविक हतियारको भण्डार रहेको पेन्टागनको अनुमान छ। यद्यपि, ती मध्ये कुनै पनि युद्धमा प्रयोग भएको छैनन् ।
यी रिपोर्टहरूको जवाफ दिँदै अमेरिकी राष्ट्रिय सुरक्षा परिषद्का एक अधिकारी जोन एफ किर्बीले व्हाइट हाउस विगत केही महिनाहरूमा आणविक हतियारहरूको सम्भावित प्रयोगको बारेमा बढ्दो रूपमा चिन्तित भएको बताएका छन् ।
तर, उनले आणविक हतियार प्रयोगका लागि रुसले कुनै पनि तयारी गरेको सङ्केत अमेरिकाले नदेखेको बताएका छन् । 'हामी सुरुदेखि नै स्पष्ट छौँ कि आणविक हतियारको सम्भावित प्रयोगको बारेमा रूसको टिप्पणीहरू गहिरो चिन्ताजनक छन्, र हामी तिनीहरूलाई गम्भीर रूपमा लिन्छौँ,' उनले भनेका छन् ।
युक्रेनले तथाकथित रेडियोधर्मीजन्य डर्टी बम प्रयोग गर्ने योजना बनाएको कुरा चलेका बेला रुसले आणविक हतियार प्रयोगको छलफल गरेको अमेरिकी गुप्तचर निकायले जनाएको हो ।
यो मुद्दा अमेरिकी र अन्य पश्चिमी अधिकारीहरू र तिनीहरूका रूसी समकक्षहरू बीचको वार्ताका क्रममा पनि उठाइएको थियो । अमेरिकी रक्षा सचिव लोयड जे अस्टिन र रूसी रक्षा मन्त्री सर्गेई के शोइगु बीचको फोन वार्तामा पनि यो मुद्दा उठाइएको बताइएको छ ।
युक्रेन युद्धको क्रममा आणविक हतियार प्रयोग गर्ने सम्भावनालाई लिएर रूसी शीर्ष अधिकारीहरू बीच उच्च बयानबाजी भएको छ। बुधवार एक विज्ञप्तिमा रुसी विदेश मन्त्रालयले राज्यको अस्तित्व खतरामा परेको बेला परम्परागत हतियारको प्रयोगको साथ आक्रामकताको जवाफमा मस्कोले आणविक हतियार प्रयोग गर्ने अधिकार रहेको दोहोर्याएको छ ।
