काठमाडौं । गठबन्धन कसिलो हुँदै गएपछि नेकपा एमाले प्रतिरक्षा गर्न थालेको छ । एमालेले आफ्ना मतदाताहरुको मत जोगाउने रणनीतिसहित गठबन्धनको प्रतिरक्षा गर्न थालेको हो । 

पछिल्लो पटक गठबन्धन दलका नेताहरुले आफ्ना नेता कार्यकर्तालाई फकाउने, निकाल्ने, तथा मिलाउने काममा सफल भएपछि एमालेले आफ्ना मतदातालाई सुरक्षित गर्न थालेको हो । 

गठबन्धनबाट मत चोरिन सक्ने सम्भावना रहेको र केही मतदाताहरु निस्कृय बस्ने भएपछि एमालेले ती मतदाताहरुलाई सुरक्षित गर्न विभिन्न उपायको खोजीमा लागेको छ । काठमाडौं बस्ने तर मत दिन नजाने मतदाताहरुको पहिचान गरेर एमालेले जिल्ला जिल्ला पठाउन थालिसकेको छ । 

गत निर्वाचन आयोगले सार्वजनिक गरेको तथ्याङ्कअनुसार स्थानीय तहमा पहिलो स्थानमा रहेको नेपाली कांग्रेसभन्दा एमालेले १ लाख ४४ हजार ५ सय ९१ मत मात्र कम ल्याएको छ । 

आयोगले वडाध्यक्षका उम्मेदवारले पाएको मतका आधारमा लोकप्रिय मत निकालेको थियो । आयोगको विवरणअनुसार एमालेले ३८ लाख ११ हजार ७ सय २ मत प्राप्त गर्दा कांग्रेसले ३९ लाख ५६ हजार १ सय ९३ मत प्राप्त गरेको थियो । 

गएको २०७४ सालको संसदीय निर्वाचनमा समानुपातिकतर्फ एमाले पहिलो नम्बरमा थियो । उसले कांग्रेसभन्दा ४५ हजार मत धेरै ल्याएको थियो । त्यसरी हेर्दा गएको संसदीय निर्वाचनको तुलनामा कांग्रेसले एमालेभन्दा करिब दुई लाख मत बढाएको छ । 

आन्तरिक कमजोरीलाई सुधारेर निर्वाचनमा सहभागी हुँदा अझै पनि कांग्रेसलाई उछिन्न सक्ने भएकाले एमाले एकल प्रतिस्पर्धामा जान चाहेको थियो । 

तर एकल प्रतिस्पर्धाको सम्भावना नभएपछि एमालेले आफ्ना सबै मत सुरक्षित गर्न सकेमा यसपटक कांग्रेसलाई उछिन्न सकिने भन्दै पार्टीका नेता कार्यकर्तालाई सोही अनुसार निर्देशन दिइसकेको छ । 

यो पटक एमालेले एक सय ४४ स्थानमा उम्मेदवारी दिएको छ । करिब करिब ७० देखि ८० स्थानमा दोस्रो हुने सम्भावना रहेकाले त्यहाँको मतान्तर घटाउनका लागि एमालेले मतदाताहरुलाई सुरक्षित गर्न थालेको हो । 

एमाले अध्यक्ष केपी शर्मा ओलीले एमालेका मात्र नभएर अन्य पार्टीका नेता कार्यकर्ताहरुलाई पनि फकाउन थालेका छन् । उनले कांग्रेसलाई भन्दा पनि बढी माओवादीलाई गाली गलौज गरेका छन् । 

कांग्रेसको असन्तुष्ट रहेको मतलाई आफ्नो पक्षमा पार्न उनको मेहनत रहेको छ भने नेकपा एसका नेता कार्यकर्तालाई त उनले चुनावअघि नै एमालेमा आएमा विशेष स्थान दिने भन्दै एमालेमा फर्कन आग्रह गरेका छन् । 

निर्वाचनपछि फर्कनुको अर्थ नहुने भन्दै चुनावअघि नै पार्टीमा फर्केर जिम्मेवारी लिनेलाई विशेष व्यवस्था गर्ने ओलीको भनाई छ । उनले माधव नेपाललाई पनि पार्टीमा फर्किन आग्रह गरेका छन् । 

एमालेले आफ्नो मत सुरक्षित गर्ने रणनीति अपनाएपछि ओलीले एमालेबाट बाहिर गएका नेता कार्यकर्तालाई पार्टीमा फर्कन आग्रह गरेका थिए । पार्टीभित्रका मतभेद, असहमति र असमझदारी तलैसम्म अन्त्य वा थाँती राखेर पार्टीपंक्ति केन्द्रीकृत र एकताबद्ध भएर मतलाई बढाउने दिशामा केन्द्रित हुनुपर्ने भन्दै एमाले पंक्तिलाई निर्देशन दिइएको छ । 

‘अहिले हाम्रो ध्यान कसरी मत बढ्छ भन्नेमा केन्द्रीत रहेको छ आफ्नो मत सुरक्षित भएमा एमालेले समानुपातिकमा पनि अन्य दलभन्दा बढी ल्याउछ’, एमालेका युवा नेता डा. भिष्म अधिकारीले भने, ‘मत सुरक्षित गर्न पार्टीको सबै पंक्ति लाग्नेछ ।’