अमेरिका र रुसले 'हतियार व्यापारी र बास्केटबल स्टार' कैदी साटे

हाम्रा कुरा

प्रकाशित २०७९ मंसिर २३ शुक्रबार

काठमाडौं । अमेरिका र रुसले दुई हाईप्रोफाइल कैदी साटासाट गरेका छन् । १२ वर्षदेखि अमेरिकी जेलमा थुनिएका रुसी हतियार व्यापारी भिक्टर बाउटलाई अमेरिकाले रुस फिर्ता गरेको छ भने, रुसी जेलमा रहेकी अमेरिकी बास्केटबल स्टार ब्रिटनी ग्रिनरलाई रुसले अमेरिका फिर्ता पठाएको हो ।

अमेरिकी राष्ट्रपति जो बाइडेनले ग्रिनर सुरक्षित रहेको र संयुक्त अरब इमिरेट्सबाट विमानमा अमेरिका फर्किएको बताएका छन् ।

'म ब्रिटनी राम्रो स्थितिमा छन् भन्न पाउँदा खुसी छु... उनलाई निको हुन समय र ठाउँ चाहिन्छ,'व्हाइट हाउसमा बोल्दै बाइडेनले भनेका छन् ।

यस्तै 'मृत्युको व्यापारी' भनेर चिनिने बाउट मास्को फर्किएका छन् । 'मध्यरातमा उनीहरूले मलाई ब्युँझाए र आफ्नो सामानहरू सँगै लैजान भने र अहिले म यहाँ छु,' रुसमा अवतरण गरेपछि राष्ट्रिय टेलिभिजनका पत्रकारसँग संक्षिप्त टिप्पणीमा बाउटले भनेका छन् ।

बाउटले आफ्नी आमा र आफ्नी श्रीमतीलाई अँगालो हाल्नुअघि फूलको गुच्छा बोकेर हवाईजहाजको सिँढी ओर्लिएको बताइएको छ।

ग्रिनरलाई गत फेब्रुअरीमा मास्को एयरपोर्टमा गाँजाको तेल राखेको आरोपमा पक्राउ गरिएको थियो र गत महिना पेनल कालोनीमा पठाइएको थियो।

बाइडेन प्रशासनले जुलाईमा कैदी आदानप्रदानको प्रस्ताव गरेको थियो । मास्कोले लामो समयदेखि बाउटको रिहाइको खोजी गरिरहेको थियो।

विस्तृत आदानप्रदानमा दुई निजी विमानहरूले जोडीलाई मास्को र वाशिंगटनबाट अबुधाबी एयरपोर्टमा ल्याइएको थियो र त्यसपछि उनीहरूलाई घर पठाइएको थियो ।