- सुन चाँदी दर
- विनिमय दर
- नेपाली पात्रो
- राशिफल
काठमाडौं । प्रतिनिधि सभा र प्रदेश सभाको निर्वाचनको मतपरिणामपछि अन्तरपार्टी संवादमा सक्रिय रहेका एमाले सचिव रघुवीर महासेठ माओवादी केन्द्रका अध्यक्ष पुष्पकमल दाहाल प्रचण्डलाई भेटेको केही दिनमै भारतको नयाँदिल्ली पुगेका छन् ।
एमालेको नेतृत्वमा सरकार बनाउनु पर्छ भन्दै दौडधुप गरेका सचिव महासेठले प्रचण्डलाई भेट गरेपछि दिल्ली उडेका हुन् । प्रचण्डसँग भेटघाट गरेपछि एमाले अध्यक्ष केपी शर्मा ओलीलाई भेटघाट गरेका महासेठले मधेस प्रदेश र अहिलेको राजनीतिक घटनाक्रमबारे जानकारी गराएका थिए ।
एमाले सचिव महासेठले एमालेबाट विभाजित भएका र हाल नेकपा एकीकृत समाजवादीका अध्यक्ष रहेका माधवकुमार नेपालसँग पनि भेटघाट गरेका थिए ।
भित्री रुपमा एमालेले सरकार बनाउने प्रयास गरिरहँदा बाहिर भने एमालेका शीर्ष नेताहरु तथा पदाधिकारीहरुले प्रतिपक्षमा बसेर सरकारलाई सहयोग गर्ने बताइरहेका छन् ।
तर पनि महासेठ शनिवार साँझ भिस्तारा एअरको उडान नम्बर युके १५६ बाट नयाँदिल्ली गएका हुन् । उनको पारिवारिक स्रोतका अनुसार त्यहाँ राजनीतिक भेटघाट हुनेछ ।
यद्यपि को सँग कहाँ कसरी भन्ने बारेमा केही खुलेको छैन । मंसिर ४ को निर्वाचनमा उनले धनुषा निर्वाचन क्षेत्र नम्बर ४ बाट नेपाली कांग्रेसका महेन्द्र यादवलाई १२४ मतको झिनो मतान्तरले पराजित गरेका थिए ।
उनकी श्रीमती जुलीकुमारी महतो पनि धनुषा निर्वाचन क्षेत्र नम्बर ३ बाट संघीय संसदमा निर्वाचित भएकी छिन् ।
फरक फरक विचारका तीन नेताहरुसँगको भेटघाटपछि महासेठ दिल्ली जानुलाई अर्थपूर्ण रुपमा लिइएको छ ।
गैर आवासीय नेपाली उपेन्द्र महतोका बहिनी ज्वाइँ महासेठले पछिल्लो समय एमालेको नेतृत्वमा वामपन्थीहरुको सरकार बनाउनु पर्ने अभियान सञ्चालन गरेका छन् ।
तर यो विषयमा एमाले अध्यक्ष र अन्य नेताहरु मौन रहेका छन् । एमाले उपाध्यक्ष विष्णु पौडेलले त एमालेलाई प्रमुख प्रतिपक्षमा बस्न जनताले म्याण्डेट दिएका कारण तत्काल सरकारमा जाने कुनै पनि योजना नभएको र कसरत पनि नगरेको बताएका छन् ।
उनले गठबन्धनकै सरकार बन्ने अवस्था रहेकाले एमालेको ध्यान त्यता आकर्षित नभएको पनि बताइसकेका छन् ।
त्यसैगरी एमाले सचिव योगेश भट्टराईले पनि सरकारमा जाने र सरकार बनाउने योजना नभएको बताएका बेला माओवादीका केही नेताहरु भने एमालेका नेताहरुसँग सम्पर्कमा रहेका छन् ।
माओवादी उपमहासचिव एवं अर्थमन्त्री जनार्दन शर्मा र शक्ति बस्नेतले एमाले नेताहरुसँग कुराकानी गरिरहेको स्रोतको दाबी छ । शर्मा त फेरि पनि अर्थमन्त्री आफू नै बन्नुपर्छ भन्दै हिँडिरहेका छन् ।
यस्तै माओवादीको पदाधिकारी बैठकले सरकार बनाउने विषयमा सबै दलसँग सहकार्य गर्ने निर्णय गरिसकेको छ । अर्थात् माओवादीले कांग्रेससँग भए पनि एमालेसँग भए पनि मिलेर सत्ता चलाउने रणनीति बनाएको छ ।
तर गठबन्धनको बैठकमा भने माओवादीले अहिलेको पाँच दलीय गठबन्धनबाटै सरकार बनाउनुपर्ने धारणा राखेको थियो ।
सरकार बनाउने बेलामा भारतको प्रभाव रहने विश्वास गर्र्दै महासेठ भारततिर लाग्नुलाई भने अर्थपूर्ण रुपमा नै हेरिएको छ । आखिर दिल्ली टाढा पनि त छैन ।
दुई देशबीचको सम्बन्ध सुधार गर्दै विकासको लहर ल्याउन सहकार्य गर्नुपर्नेमा अब आन्तरिक राजनीतिका लागि पनि माहोल बनाउन महासेठ जानुलाई भने सहज रुपमा लिइएको छैन ।
कुनै पनि दलको बहुमत नआएका कारण सत्ता चलाउने रणनीति दलहरुले बनाउँदै छन् । तर कसको नेतृत्वमा सरकार बन्छ भन्ने यकिन छैन ।