काठमाडौं । रुसी राष्ट्रपति भ्लादिमिर पुटिनले आफ्ना समकक्षी अलेक्जेन्डर लुकाशेन्कोसँग वार्ता गर्न सोमबार बेलारुसको भ्रमण गर्ने बेलारुसी नेताको कार्यालयले जनाएको छ।
बेलारुसी राष्ट्रपतिको कार्यालयले मिन्स्कको स्वतन्त्रता दरबारमा दुवै नेताहरुले पुटिनको कार्यात्मक भ्रमणका बेला छलफल गर्ने जनाएको छ ।
बेलारूसी क्षेत्र सहित विभिन्न दिशाबाट सुरु गरिएको युक्रेनमा रूसी आक्रमणको १० महिनापछि यो भेट भइरहेको हो ।
बेलारुसको राजधानी मिन्स्कले दुवै नेताले 'बेलारुसी-रूसी एकीकरण'मा एक-एक वार्ताका साथै आफ्ना मन्त्रीहरूसँग व्यापक वार्ता गर्ने जनाएको छ। बेलारुसी राष्ट्रपतिको कार्यालयद्वारा विज्ञप्तिमा भनिएको छ,'राष्ट्रपतिहरूले सुरक्षाका मुद्दाहरूलाई पनि प्राथमिकता दिनेछन् र क्षेत्र र विश्वको स्थितिमा विचार आदानप्रदान गर्नेछन् ।'
आक्रमण सुरु भएदेखि नै दुवै देशले आर्थिक र रक्षा सहकार्यलाई गहिरो बनाउन खोजेका बेला लुकासेन्कोले युक्रेनमा बेलारूसी सेना पठाउने तयारी नभएको पटक पटक भन्दै आएका छन् ।
यसबीच युक्रेनी अधिकारीहरूले राजधानी कीभ, दक्षिणी क्रिभिई रिह र उत्तरपूर्वी खार्किभमा ऊर्जा सुविधाहरू र पूर्वाधारहरूमा 'ठूलो' रूसी आक्रमणहरू भएको बताएका छन् ।
रुसको सरकारी समाचार एजेन्सी तासले रुस नियन्त्रित लुहान्स्क क्षेत्रमा युक्रेनी गोलाबारीमा आठ जनाको मृत्यु भएको र २३ जना घाइते भएको जनाएको छ ।
