व्यावसायिक आइडिया भए लगानीको समस्या छैन : वरिष्ठ उपाध्यक्ष ढकाल
हाम्रा कुरा
प्रकाशित २०७९ पुष ३ आइतबार
771
Shares
काठमाडौँ। नेपाल उद्योग वाणिज्य महासङ्घका वरिष्ठ उपाध्यक्ष चन्द्रप्रसाद ढकालले व्यावसायिक आइडिया भए लगानीको समस्या नरहेको बताएका छन्।
शनिवार बुटवलमा आयोजित युवा व्यवसायी समिटलाई सम्बोधन गर्दै वरिष्ठ उपाध्यक्ष ढकालले व्यवसाय गर्ने आइडिया भए लगानीका लागि लगानीकर्ता तथा बैङ्कहरू उपलब्ध हुने बताए।
"यदि तपाईँसँग आइडिया छ, तपाईँ आमजनताको लागि काम गर्नुहुन्छ र इमानदारीसाथ काम गर्नुहुन्छ भने तपाईँलाई लगानीको समस्या हुँदैन। बैङ्क तथा वित्तीय सस्ताहरू र लगानीकर्ताहरू तपाईँलाई लगानी गर्न तयार हुन्छन्। अहिले भलै बैकमा तरलताको समस्या देखिएको छ। तर मलाई लाग्छ यो समस्या लामो रहँदैन। बिस्तारै सहज हुँदै जान्छ," उनले बताए।
मूल्यवृद्धि र बैङ्किङ क्षेत्रमा देखिएको तरलता अभावका कारण मुलुकको अर्थतन्त्रमा परेको समस्याले व्यवसाय र व्यवसायीहरू मारमा परेको उनले बताए।
अहिले निजी क्षेत्रले उठाएको एजेन्डाहरू निजी क्षेत्रको मात्र नभई समग्र अर्थतन्त्रको सुधारको लागि रहेको बताउँदै उनले निजी क्षेत्रका एजेन्डा भन्दै बेवास्ता गर्दै जाने हो भने यसको परिणाम सबै नेपालीले भोग्नुपर्ने बताए।
उनले सरकारी संयन्त्रबिच एक आपसमा समन्वयको कमी रहेको यसको मार निजी क्षेत्रले खेप्नुपरेको बताए।
रेमिट्यान्स, बैङ्किङ तथा पर्यटन क्षेत्रको आफ्नो व्यावसायिक सफलताको उदाहरण दिँदै ढकालले राज्यको प्राथमिकता र आम जनताको सेवासँग जोडिएको कुनै पनि व्यवसाय सजिलै सफल हुने बताए।
