कुख्यात अपराधी चार्लस् शोभराजलाई १५ दिनभित्र छाड्न सर्वोच्चको आदेश
हाम्रा कुरा
प्रकाशित २०७९ पुष ६ बुधबार
982
Shares
तस्बिर – फाइल ।
काठमाडौं । सर्वोच्च अदालतले सिरियल किलरको रुपमा चर्चित अपराधी चार्लस् शोभराजलाई १५ दिन भित्र छाड्न आदेश दिएको छ । न्यायाधीश सपना प्रधान मल्ल र तिल प्रसाद श्रेष्ठको संयुक्त इजलासले उनलाई कैदबाट मुक्त गरी स्वदेश फर्काउन आदेश दिएको हो । आदेशमा वृद्धको सुविधा दिएर छाड्न भनिएको छ । शोभराजले गृह मन्त्रालय, कारागार व्यवस्थापन विभाग लगायतलाई विपक्षी बनाई रिट दायर गरेका थिए ।
उनी हत्याको आरोपमा जेलमा रहँदै आएका थिए । कर्तव्य ज्यान मुद्दामा सजाय काटिरहेका ७८ वर्षीय शोभराज मुटुको रोगी भएकाले ओपन हार्ट सर्जरी गर्नुपर्ने भएकाले कारागार नियमावली, २०२० को नियम २९ (२क) ले ६५ वर्ष उमेर पुगेका कैदीहरुलाई ७५ प्रतिशतसम्मको कैद सजाय छोट्याउन सक्ने व्यवस्थाअनुसार थुनामुक्त गर्न सर्वोच्चले आदेश गरेको हो ।
कुख्यात अपराधी शोभराजलाई रिहा गर्न भन्दै २०७७ पुसमै बन्दी प्रत्यक्षीकरण रिट परेको थियो । दुई वर्षपछि मात्रै उनी जेलबाट रिहा भएर देश फर्किने भएका हुन् ।
७८ वर्षीय शोभराजले २०७७ पुस ७ गते कैद छुटको माग गर्दै रिट दायर गरेका थिए । जेष्ठ नागरिक ऐन अनुसार ७५ वर्ष पूरा भएकालाई ७५ प्रतिशत कैद छुट दिइने व्यवस्था छ ।
