काठमाडौं । रुसी राष्ट्रपति भ्लादिमिर पुटिनले रुस युक्रेन द्वन्द्वमा संलग्न सबै पक्षहरूसँग वार्ता गर्न तयार रहेको तर कीभ र उसका पश्चिमी समर्थकहरूले वार्तामा संलग्न हुन अस्वीकार गरेको बताएका छन् ।
'हामी स्वीकार्य समाधानका लागि संलग्न सबैसँग वार्ता गर्न तयार छौं, तर यो उनीहरूमा निर्भर छ, हामी वार्ता गर्न अस्वीकार गर्नेहरू होइनौं, तिनीहरू हुन्,' पुटिनले रोसिया १ राज्य टेलिभिजनसँग अन्तर्वार्तामा बोल्दै भनेका छन् ।
'मलाई विश्वास छ कि हामी सही दिशामा काम गरिरहेका छौं, हामीले हाम्रो राष्ट्रिय हित, हाम्रा नागरिक, हाम्रा जनताको हितको रक्षा गरिरहेका छौं। र हामीसँग हाम्रा नागरिकहरूको सुरक्षाको लागि अर्को विकल्प छैन,' उनले अघि भनेका छन् ।
यसबीच चिनियाँ विदेशमन्त्री वाङ यीले युक्रेन युद्धमा चीनको अडानको बचाउ गर्दै आगामी वर्ष रुससँगको सम्बन्धलाई अझ प्रगाढ बनाउने सङ्केत दिएका छन् ।
युक्रेनमाथिको आक्रमणको निन्दा गर्न र रुसमाथि प्रतिबन्ध लगाउने बिषयमा चीनको अस्वीकारले पश्चिमासँगको सम्बन्धलाई थप चिसो बनाउनुका साथै युरोपसँग उभरिरहेको विभाजनलाई झनै बढाएको छ ।
चिनियाँ राजधानीमा आयोजित एक सम्मेलनमा भिडियोमार्फत बोल्दै वाङले चीनले रुससँग ‘रणनीतिक पारस्परिक विश्वास र पारस्परिक लाभकारी सहयोगलाई गहिरो बनाउने’ बताएका छन्। यी दुई देशका युद्धपोतहरूले गत हप्ता पूर्वी चीन सागरमा संयुक्त नौसैनिक अभ्यास गरेका थिए।
