लुम्बिनी। माघको पहिलो हप्ता बिती सक्दा पनि चिसो सिरेटो सगैं हुने शितलहरले तराईको जनजीवन प्रभावित बनेको छ। पश्चिम तराईको पश्चिम नवलपरासी, रुपन्देही र कपिलवस्तुमा कठ्याङ्ग्रिने जाडो बढेको छ। दिउसो मौसम खुले पनि बिहानीपख लाग्ने बाक्लो हुस्सुले जनजीवन प्रभावित बनाएको छ।
पुसको अन्तिम सातादेखि लगातार चलिरहेको शीतलहर र बाक्लो हुस्सुसँगै बढेको जाडोले मध्य तथा पूर्वी तराईका जिल्लाको जनजीवन प्रभावित भएको छ। पुस यता प्रदेश नं. २ मा मात्र चिसोका कारण चार जनाको मृत्यु भइसकेको छ।
संसाझैबाटै दिउसो अबेरसम्म लाग्ने बाक्लो हुस्सुले सर्वसाधारण घरभित्रै खुम्चिन बाध्य बनेका छन् । चिसोले सबैभन्दा धेरै बालबालिका र वृद्धवृद्धा प्रभावित भएका छन्। ज्याला मजदुरी गरेर जीविकोपार्जन गर्ने विपन्न परिवार काम गर्न नसकेर समस्यामा छन्। घर, चौकमा आगो र हिटर बालेर बस्नेहरू बढेका छन्।
जाडो बढेपछि तौलिहवा, पिपरा र बहादुर गन्ज अस्पतालमा श्वासप्रश्वास र दमका रोगीको उपचार गराउनेको सङ्ख्या ह्वात्तै बढेको छ।
