काठमाडौं। नेटोका महासचिव जेन्स स्टोल्टनबर्गले पश्चिमी सैन्य गठबन्धनले जापानसँगको आफ्नो साझेदारीलाई सुदृढ गर्न जारी राख्ने बताएका छन्।
यसका साथै उनले युक्रेनमा रुसको युद्धले विश्वव्यापी खतरा खडा गरेकोले 'हाम्रो सुरक्षा एक आपसमा जोडिएको छ,' भन्दै सम्बन्ध बलियो बनाउने बताएका छन्।
सोमबार दक्षिण कोरियाबाट टोकियो पुगेका नेटोका महासचिव स्टोल्टनबर्गले युक्रेनका लागि सियोललाई सैन्य सहयोग बढाउन आग्रह गरेका थिए।
स्टोल्टेनबर्गले आफ्नो यात्रा नेटो र यसका उच्च मूल्यवान् साझेदार जापान बीचको सम्बन्धलाई सुदृढ पार्ने उद्देश्यले भएको बताएका छन्।
'युक्रेनको युद्धले हाम्रो सुरक्षा एक आपसमा जोडिएको छ भनेर पनि देखाउँछ,' स्टोल्टेनबर्गले टोकियोको उत्तर स्थित इरुमा एयर बेसको भ्रमणको क्रममा मंगलबार भनेका छन्।
'यदि राष्ट्रपति भ्लादिमिर पुटिनले युक्रेनमा जिते भने यो युक्रेनीहरूका लागि एक त्रासदी हुनेछ, तर यसले विश्वभरका अधिनायकवादी नेताहरूलाई पनि धेरै खतरनाक सन्देश पठाउनेछ किनभने तिनीहरूका लागि यो सैन्य बल प्रयोग गर्दा लक्ष्य हासिल गर्न सकिन्छ भन्ने सन्देश हुनेछ,' उनले भनेका छन्।
'युक्रेनको युद्ध हामी सबैको लागि महत्त्वपूर्ण छ र त्यसैले हामी जापानले प्रदान विमान, कार्गोलगायतका क्षमताको सहयोगको लागि पनि धेरै आभारी छौं,' स्टोल्टेनबर्गले अघि भनेका छन्।
जापानका प्रधानमन्त्री फुमियो किशिदाले युरोपमा रुसको आक्रामकता ताइवानसँग चीनको बढ्दो तनावका र उत्तर कोरियाको धम्कीलाई लिएर चिन्ता बढिरहेको एसियामा पनि हुनसक्ने चेतावनी दिएका छन्।
