काठमाडौं । राष्ट्रिय स्वतन्त्र पार्टीका सभापति रवि लामिछानेले फेरि आफू महाभारतको अभिमन्यु नभएको बताएका छन् । आज गरेको पत्रकार सम्मेलनमा बोल्दै रविले आफू महाभारतको अभिमन्यु नभएको भन्दै आफू युद्धको घेराबन्दीमा परेपछि उम्कन पनि जानेको बताए ।
उनले आफूलाई नेताहरुदेखि संचारकर्मी सबैले घेरामा पारेर पराजित गर्न खोजेको आरोप लगाए । रवि लामिछानेले चितवनका चितवनवासीप्रति क्षमा माग्दै भने, ‘मैले दुःख दिएको छु क्षमा चाहन्छु । के मलाई भारी मतले जिताउने मतदाताको नागरिकता पनि फर्जी थियो ?’
आफूले गृह मन्त्रालय छाड्नु परेकोमा अलिअलि रिस लागेको भन्दै उनले नेपाली पत्रकारिता गलत तरिकाले चलेको आरोपसमेत लगाए । रविले सम्पादकहरुलाई हेपेर बोल्दै सम्पादकका श्रीमतीहरुलाई सम्पादकको मोबाइल चेक गर्न पनि आग्रह गरे ।
उनले ‘कहिलेकाहिँ जोकर भएन भने सर्कस चल्दैन भन्छन् त्यस्तै हो’ भन्दै उनले ऋषि धमलालाई हेपेर बोले ।
सामाजिक संजालले नै अहिलेको सरकार चलेको भन्दै उनले रविन्द्र मिश्रसँग पनि उनले आक्रोश पोखे ।
उनले आफूलाई पूर्वगृहमन्त्रीको रुपमा कुनै पनि सुरक्षा नचाहिने पनि बताएका छन् । उनले पटक पटक नेपालका मिडिया टाइकुनमाथि पनि आक्रोश पोखेका छन् । उनले पत्रकारलाई संजय बन्ने कि नारद बन्ने स्पष्ट हुन आग्रहसमेत गरेका छन् ।
रविले कुनै पनि मिडियाले आफ्नो बारेमा गलत समाचार सम्प्रेषण गरेमा त्यो कार्यालयमा गएर धर्ना बस्नेसमेत बताए ।
उनले भारतीय प्रधानमन्त्री नरेन्द्र मोदीसँग मिलेर काम गर्न चाहेको भन्दै एजेन्टहरु पठाउँदा र यहाँका एजेन्टहरुसँग काम नगर्न आग्रह गरेका छन् । उनले हिन्दी र अंग्रेजी दुवै भाषामा बोलेर मोदीलाई सम्बोधन गरेका थिए ।
उनले भारतलाई गाली नगरेसम्म राष्ट्रवादी भइँदैन भन्ने भ्रम पनि नेपालमा छरिएको पनि मोदीसँग सिधा कुरा गर्ने पनि बताए ।
उनले आफूलाई पासपोर्ट काण्डमा फसाउन सकिन्छ भनेर लाग्नेहरुलाई चुनौतीसमेत दिएका छन् ।
