काठमाडौं । प्रधानमन्त्री पुष्पकमल दाहाल ‘प्रचण्ड’ले भोलिसम्ममा सरकारले पूर्णता पाउने बताएका छन् । बुधबार राजधानीमा भएको एक कार्यक्रममा बोल्दै प्रधानमन्त्री प्रचण्डले आज वा भोलिमा सरकारले शतप्रतिशत पूर्णता पाउने बताएका हुन् ।
प्रधानमन्त्रीले कठिन परिस्थितिमा सरकारको नेतृत्व गरिरहेको बताएका छन् । प्रधानमन्त्रीले भने, ‘‘कठिन परिस्थितिमा सरकारको नेतृत्व गरिरहेको छु । चुनौती नै चुनौतीका बीचसमेत देशका लागि केही गर्न सकिन्छ भन्ने दृढतासहित सरकारको नेतृत्व गरिरहेको छु । यसलाई मैले चुनौतीपूर्ण अवसर भनेको छु ।”
साँढे तीन महिना हुँदा समेत प्रधानमन्त्रीले मन्त्रीपरिषद्लाई पूर्णता दिन सकेका छैनन् । अब छ मन्त्रालयमा मन्त्री नियुक्त हुन बाँकी छ । भागबण्डामा ८ मन्त्रालय पाए पनि नेपाली कांग्रेसले ४ वटा मन्त्रालयमा मात्र मन्त्री पठाउन सकेको छ । कांग्रेसभित्र संस्थापन इतरले कम्तीमा ३ वटा मन्त्रालय खोजेको छ । सम्मानजनक निर्णय नभएसम्म इतर समूह सरकारमा जाने मन्त्रीको नाम नपठाउने निर्णय गरेको छ ।
यता जसपाले १ मन्त्रीको टुङ्गो लगाएको छैन भने जनमत पार्टीले पनि मन्त्री पठाएको छैन । यसअघि जनमतबाट खानेपानी मन्त्री रहेका अब्दुल खानले उद्योग मन्त्रालय नपाएको भन्दै राजीनामा दिएका थिए । उद्योग कांग्रेसको भागमा परेको छ ।
