- सुन चाँदी दर
- विनिमय दर
- नेपाली पात्रो
- राशिफल
काठमाडौँ । सरकारले नेपाली सेनाका कर्णेल यामबहादुर अधिकारीको अवकाशलाई जानबाट फेरि पनि रोकेको छ । प्रधानमन्त्री तथा मन्त्रीपरिषद कार्यालय उच्च स्रोतका अनुसार माओवादी लडाकुलाई नेपाली सेनामा समायोजन गरिँदा सबैभन्दा माथिल्लो दर्जा (कर्णेल) पाएका यामबहादुर अधिकारी (प्रतीक्षा) असोज १ गते सोमबारबाट अवकाशमा जानु पर्नेमा रक्षा मन्त्रालयलाई पत्राचार गरेर जागिर थमौती गर्न भनेपछि कार्यवाहक प्रधानमन्त्रीसमेत रहेका उपप्रधान तथा रक्षामन्त्री पूर्णबहादुर खड्काले जागिर थमौती गरेका हुन् ।
कर्णेल अधिकारीको यसअघि नै अवकाश सकिएको थियो । २०७६ असोजमै सकिएको भए पनि सैनिक नियमावली अनुसार एकपटकका निम्ति सहायक रथीमा पदोन्नती दिन सकिने व्यवस्थालाई टेकेर तत्कालीन प्रधानमन्त्री केपी शर्मा ओलीको सरकारले बढुवा गरेको थियो ।
त्यसको म्याद चार वर्षको हुन्छ र सोमबार सकिदैँथियो । फेरि पनि सरकारले सैनिक नियमावली अनुसार चाहँदा अर्को तीन वर्ष म्याद थपिन सक्ने व्यवस्थालाई पछ्याउदै थप तीन वर्ष जागिर थमौती गरेको हो ।
प्रधानमन्त्री पुष्पकमल दाहाल प्रचण्ड गत शनिबार अमेरिका प्रस्थान गर्नुअघि नै रक्षा मन्त्रालयलाई पत्राचार गरिसकेका थिए ।
तत्कालीन जनमुक्ति सेनाबाट नेपाली सेनामा समायोजन गरिएकामध्ये सबैभन्दा माथिल्लो दर्जामा पुग्ने अधिकृत यमबहादुर अधिकारी ‘प्रतिक्षा’ बनेका थिए । उनलाई २०७६ असोज १ मा बसेको मन्त्रिपरिषद बैठकले सहायक रथीमा बढुवा गरेको थियो ।
सरकारले विशेष पद सिर्जना गरेर अधिकारीलाई सहायक रथीमा पदोन्नति गरेको थियो । नेपाली सेनाको जंगीअड्डा स्रोतका अनुसार चार वर्षको पदावधि सकिएपछि उनको असोज १ बाट पद स्वतः खारेज हुनुपर्ने हो । तर आफ्नो हात जगन्नाथ गर्दै फेरि तीन वर्ष म्याद थपिएको छ ।
विशेष पद भएकाले स्वतः खारेज हुनुपर्नेमा उल्टै प्रधानमन्त्रीले म्याद थप गरेका हुन् । विद्रोही माओवादी शान्ति प्रक्रियामा आएपछि भएको समायोजनका क्रममा उनी उपसेनानी बनेका थिए ।
त्यसको केही समयमै उनी महासेनानी (कर्णेल) बन्न सफल भएका थिए । त्यतिबेला शान्ति प्रक्रिया अझै सकिइनसकेको अवस्थामा सकारात्मक सन्देश प्रवाह गर्न पनि उनलाई बढुवा गरिएको हुनसक्ने सैनिक अधिकृतहरुले बताएका थिए ।
किनकि उनले सहायक रथी बन्न चाहिने ‘हाइयर कमाण्ड कोर्स’ पूरा गरेका थिएनन् । तर यसपालि पनि बिना कुनै विशेष कारण उनको म्याद थमौती गर्नुलाई सेनाभित्र सहज रुपमा लिइएको छैन ।