कोशीमा सहमतीय सरकारको प्रयास जारी, माओवादी र एसलाई समेटेर आजै विस्तार हुने
विवेक मिश्र,
प्रकाशित २०८० कार्तिक १७ शुक्रबार
924
Shares
तस्बिर – फाइल ।
काठमाडौँ । कोशी प्रदेशमा सरकार विस्तारको प्रयास जारी रहेको छ । सहमति गरी आजै सरकार विस्तार गर्ने तयारी भएको मुख्यमन्त्री केदार कार्कीले बताएका छन् ।
उनले माओवादी केन्द्र र नेकपा एसका तर्फबाट आजै नाम दिइने र नाम आउनासाथ सरकार विस्तार गर्ने बताए ।
स्रोतका अनुसार अहिले माओवादी र नेकपा एसका नेताहरु छलफलमा जुटेका छन् ।
अहिले एक एक जनाको नाम लिएर सरकारमा सहभागी गराउने जनाइएको छ ।
कोशीमा कांग्रेसको विद्रोह पक्षबाट संविधानको धारा १६८ को ५ अनुसार कार्की मुख्यमन्त्री बनेका हुन् ।
उनलाई नेकपा एमालेले साथ दिएको छ । एमाले पनि सरकारमा रहेको छ ।
एमालेले गठबन्धनका माओवादी, नेकपा एस समावेश नगर्न भन्दै आए पनि मिलाएर लैजाने र सहमतिमै कोशीको समृद्धिका लागि अगाडि बढ्ने भन्दै कार्कीले माओवादी र नेकपा एससँग पनि पहल थालेका हुन् ।
कार्कीले एमाले पनि कोशीमा मध्यावधि चुनाव होस् भन्ने नचाहेकाले अब मिलेरै कोशीको विकासमा सबै एकजुट भएर लाग्ने बताए ।
कोशी सरकारका प्रवक्ता एवं मन्त्री शमशेर राईले सहमतिकै सरकारको अडानमा शुरुआतदेखि नै भएकाले त्यसको प्रयास भइरहेको बताए । उनले कोशी बचाउने जिम्मा जिम्मेवार सबै दलको भएकाले पनि आफूहरु यो प्रयासमा लाग्नु अनुपयुक्त नभएको बताए ।
