अमेरिका र दक्षिण कोरियाले उत्तर कोरियाली शासनको अन्त्य गर्ने चेतावनीकाबीच परीक्षण
हाम्रा कुरा
प्रकाशित २०८० पुष २ सोमबार
756
Shares
काठमाडौँ । उत्तर कोरियाली नेता किम जोङ उनले पिताको पुण्य तिथिमा क्षेप्यास्त्र प्रहार गरेका छन् ।
आइतबार किमले उनका पिता तथा पूर्ववर्ती किम जोङ इलको निधन भएको मिति पारेर एउटा ब्यालेस्टिक क्षेप्यास्त्र प्रहार प्रक्षेपण गरेका हुन् ।
इलको सन् २०११ डिसेम्बर १७ मा निधन भएको थियो ।
संयुक्त राज्य अमेरिका र दक्षिण कोरियाले कुनै पनि आणविक आक्रमणले प्योङयाङको शासनको अन्त्य हुने चेतावनी दिइरहेका बेला किमले प्रक्षेपण गरेको सोलको सेनाले जनाएको छ ।
“उत्तर कोरियाले पूर्वी सागरतर्फ अज्ञात ब्यालेस्टिक क्षेप्यास्त्र प्रहार गरेको छ,” सोलका ज्वाइन्ट चिफ अफ स्टाफले भने ।
दुई मित्र राष्ट्रले शुक्रबार वासिङ्टनमा आणविक परामर्श दाता समूहको दोस्रो बैठक आयोजना गरेका थिए, जहाँ उनीहरूले उत्तर कोरियासँगको द्वन्द्वको स्थितिमा आणविक प्रतिरोधका बारेमा छलफल गरेका थिए ।
उत्तर कोरियाले गत वर्ष आफूलाई ‘अपरिवर्तनीय’ आणविक शक्ति घोषणा गरेको थियो । उसले आफ्नो आणविक कार्यक्रम कहिल्यै नछोड्ने बताउँदै आएको छ ।
गत महिना प्योङयाङले सैन्य जासुसी उपग्रहलाई सफलतापूर्वक अन्तरिक्षमा स्थापित गरेको थियो ।
त्यसपछि उसले आकाशबाट आफ्नै प्रविधिले अमेरिका र दक्षिण कोरियाका प्रमुख सैन्य स्थलहरूको तस्बिर उपलब्ध गराइसकेको दाबी गर्दै आएको छ ।
