काठमाडौँ । आफ्ना विमानहरूको आधुनिकीकरण गरिरहेको जर्मन एयरलाइन्स लुफ्थान्साले करिब नौ अर्ब डलरमा बोइङबाट ४० र एयरबसबाट ४० विमानको अर्डर गरेको मङ्गलबार बताएको छ ।
बोइङ विमान ७३७-८ एमएएक्स र एयरबस विमान ए२२०-३०० मोडेलको हुने एयरलाइन्सले एक विज्ञप्तिमा उल्लेख गरेको छ ।
लुफ्थान्सा बोर्डका सदस्य डेटलेफ केसरले भने, “हामी हाम्रो कम्पनीको इतिहासमा सबैभन्दा ठूलो विमान आधुनिकीकरणमा तीव्रता दिइरहेका छौँ ।”
एयरबसका विमानको प्रयोग लुफ्थान्साको नयाँ क्षेत्रीय वाहक सिटी एयरलाइन्सले गर्ने उद्देश्य राखेको छ । सिटी एयरलाइन्स सन् २०२४ को गृष्ममा सञ्चालन सुरु हुनेछ ।
सन् २०२६ मा पहिलो वितरण गरिने ती विमानलाई फ्र्याङ्कफर्ट र म्युनिखबाट छोटो दूरीका मार्गमा परिचालन गरिने छ ।
पहिलो डेलिभरी सन् २०२७ मा हुने बोइङ विमानको प्रयोग छोटो र मध्यम दूरीका मार्गमा गर्न सकिनेछ ।
लुफ्थान्सा समूहका कुन एयरलाइन्सले विमानहरूको प्रयोग गर्ने हो भन्नेबारेमा कुनै अन्तिम निर्णय लिइएको छैन ।
समूहका वाहकहरूमा लुफ्थान्सा, युरोविङ्ग्स, अस्ट्रियन, स्विस र ब्रसेल्स एयरलाइन्स रहेका छन् ।
नयाँ विमान शान्त र अधिक आरामदायक हुने र आफ्ना पूर्ववर्तीहरूको तुलनामा ३० प्रतिशत कम कार्बनडाइअक्साइड उत्सर्जन गर्ने केसरले बताए ।
सन् २०१९ को तुलनमा सन् २०३० सम्ममा आफ्नो शुद्ध कार्बन उत्सर्जनलाई आधा गर्ने र सन् २०५० सम्ममा कार्बन तटस्थ बन्ने लुफ्थान्साको लक्ष्य छ ।
यद्यपि उड्डयन क्षेत्रलाई डिकार्बोनाइज गर्न सबैभन्दा कठिन छ र यसको आशा स्थायी उड्डयन इन्धन (एसएसएफ) मा अडिएको छ । एसएसएफ एउटा जैविक इन्धन हो ।
यसले परम्परागत जेट इन्धनको तुलनामा कम कार्बन उत्सर्जन गर्छ तर हाल यसको उत्पादन लागत अत्यन्त महङ्गो छ ।
कोरोना भाइरस महामारीले हवाई यात्रा बन्द हुँदा जर्मन सरकारले लुफ्थान्सालाई जमानत दिनुपरेको थियो तर एयरलाइन्स सुदृढरूपमा फर्किएको छ ।
नोभेम्बरमा लुफ्थान्सा समूहले गृष्मको यात्रापछि तेस्रो त्रैमासिकको मुनाफामा वृद्धि भएको बताएको थियो । उसले आगामी महिनाहरूमा पनि मुनाफा जारी रहने अपेक्षा गरिएको बताएको छ ।
