जनताका पक्षमा इमान्दार भएर काम गर्नुपर्छ : प्रकाशमान सिंह

हाम्रा कुरा

प्रकाशित २०८० पुष २९ आइतबार

पोखरा । नेपाली कांग्रेसका नेता प्रकाशमान सिंहले जनताका पक्षमा इमान्दार भएर काम गर्नुपर्ने बताएका छन् । नेपाली कांग्रेस कास्कीका कार्यकर्तासँग आइतबार पोखरामा भएको भेटमा यस्तो बताएका हुन् ।

उनले केही समययता राजनीतिक परिस्थिति फेरिएकाले जनताले काम र राजनीतिक पारदर्शिता खोजिरहेका बताए । २०१७ सालमा निष्ठाको राजनीति गरेकोले बीपी, गणेशमान र कृष्णप्रसाद भट्टराई जनतामाँझ अहिले पनि स्वच्छ नेताको रुपमा चिनिँदै आएका नेता सिंहले बताए ।

नेपाली कांग्रेसले अब आफ्नो नीतिमा सुधार गर्दै जनता केन्द्रित राजनीति गर्न जरुरी रहेको उनको भनाइ थियो । नेता सिंहले इमान्दार भएर जनताका काम नगर्ने हो भने अब कुनै पनि राजनीतिक दलको भविष्य नरहने बताउँदै समयअनुसार दलहरु पनि परिवर्तन हुन जरुरी रहेको बताए ।