भारतमा भएको मुठभेडमा कम्तीमा १३ नक्सलीस्ट विद्रोहीको मृत्यु
एएफपी,
प्रकाशित २०८० चैत २३ शुक्रबार
498
Shares
नयाँ दिल्ली। मध्य भारतमा भएको मुठभेडमा कम्तीमा १३ जना नक्सलीस्ट विद्रोहीको मृत्यु भएको प्रहरीले बुधवार जनाएको छ।
छत्तीसगढ राज्यको बिजापुर जिल्लाको दुर्गम जङ्गलमा मङ्गलवार सुरक्षा बलसँग गोली हानाहान भएको थियो।
स्थानीय प्रहरी प्रमुख पी सुन्दरराजले अधिकारीहरूले राइफल, मेसिन गन र गोला बारुद ठूलो परिणाममा जफत गरेको बताउनु भएको छ। मृतकहरूको पहिचान हुन बाँकी रहेको बताउँदै सुन्दरराजले मृतकमध्ये तीन जना महिला रहेको बताएका छन्।
प्रहरीले उपलब्ध गराएको तथ्याङ्क अनुसार यस वर्ष भारतमा ५० जना भन्दा बढी माओवादी मारिएका छन् जसमध्ये सबैभन्दा बढी ४६ जना छत्तीसगढमा र अन्य चार महाराष्ट्र राज्यमा मारिएका छन्।
मध्य, दक्षिणी र पूर्वी राज्यहरूमा फैलिएको विद्रोही बहुल “रेड कोरिडोर“ मा माओवादी विद्रोहीहरूसँग लड्न भारतले दशौँ हजार सुरक्षाकर्मी तैनाथ गरेको छ।
नक्सलवादी भनेर चिनिने र ग्रामीण गरिबहरूका लागि लडिरहेका विद्रोहीहरूले सन् १९६७ देखि छापामार आक्रमण गरिरहेका छन्।
भारत सरकारले दुर्गम क्षेत्रहरूमा पूर्वाधार विकासमा लाखौँ डलर खर्च गरेको छ। सन् २०१० मा ९६ जिल्लामा फैलिएको माओवादी प्रभाव सन् २०२३ मा ४५ जिल्लामा सीमित भएको छ।
सरकारी तथ्याङ्क अनुसार गत दशकमा मारिएका विद्रोहीहरूको वार्षिक सङ्ख्या दुई तिहाइभन्दा बढीले घटेको छ। भारतमा आगामी अप्रिल १९ देखि लोकसभाका लागि छ हप्ता लामो आमनिर्वाचन हुँदै छ।
