राष्ट्रपति भण्डारीले बाबा रामदेवको योग शिविरको उद्घाटन गर्दै, सुरक्षा व्यवस्था कडा

प्रकाशित मिति : २०७३ मङ्सिर ८ बुधबार
वीरगन्ज । वीरगन्जमा बिहीबारदेखि सञ्चालन हुने योग शिविरको उद्घाटन गर्न राष्ट्रपति विद्यादेवी भण्डारी बुधबार अपरान्ह यहाँ आउने भएपछि यहाँको सुरक्षा व्यवस्था कडा पारिएको छ । 
 
वीरगन्ज नगर प्रवेश गर्ने नाका, टोल र चोकमा प्रहरीले चेकजाँच र सतर्कता बढाएको पर्साका प्रहरी प्रमुख उपरीक्षक राजुबाबु श्रेष्ठले बताए । 
 
राष्ट्रपति भण्डारी र योगगुरु बाबा रामदेवको वीरगन्ज आगमनलाई लक्षित गरी जिल्लामा रहेका तीनवटै सुरक्षा निकाय नेपाल प्रहरी, सशस्त्र प्रहरी र नेपाली सेना गरी संयुक्त सुरक्षा योजना बनाएर सुरक्षाकर्मीलाई परिचालन गरिएको हो । 
 
पाँच दिनसम्म चल्ने योग शिविर अवधिभर सुरक्षालाई दृष्टिगत गरी वीरगन्जमा रहेका होटलमा पनि निगरानी बढाइएको छ । 
 
वीरगन्जसँग जोडिएका भारतीय नाकामा समेत चेकजाँच बढाइएको छ । योग शिविर उद्घाटन गर्न बुधबारै राष्ट्रपति भण्डारी यसतर्फ आई बारा जिल्लाको प्रसिद्ध शक्तिपीठ गढीमाई मन्दिरमा पूजाअर्चना गर्ने कार्यक्रम रहेको पर्साका प्रमुख जिल्ला अधिकारी केशवप्रसाद घिमिरेले बताए । 
 
योगगुरु स्वामी रामदेव र आयुर्वेद शिरोमणि बालकृष्ण आचार्यको उपस्थितिमा बीरगन्जको आदर्शनगर रंगशालामा बिहीबार हुने योग शिविर र बाराको प्रसौनी–२ मा रहेको पतञ्जलि आयुुर्वेद प्रालिको राष्ट्रपति भण्डारीले उद्घाटन गर्ने कार्यक्रम रहेको छ । 
 
उद्घाटन कार्यक्रम सम्पन्न भएपछि राष्ट्रपति भण्डारी बिहीबार नै काठमाडौँ फर्किने कार्यक्रम रहेको जिल्ला सुरक्षा समितिले जनाएको छ । 
 
राष्ट्रपति भण्डारीले उद्घाटन गर्ने योग शिविरको सम्पूर्ण तयारी पूरा भएको शिविर तयारी समितिका संयोजक विजय सराबगीले बताए । 
 
विभिन्न स्थानमा ३५ वटा स्वागतद्वार बनाइएको छ भने तीनसय ५० वटा फ्लेक्स बोर्ड राखिएको बताइएको छ । रासस 

ईआइसिटी नेपाल प्रालिद्धारा संचालित हाम्राकुरा डटकममा प्रकाशित कुनै पनि सामाग्री ईआइसिटी नेपालको पूर्व जानकारी विना हुवहु एवं आंशिक रुपमा समेत कपी गरि प्रकाशन गर्नु दण्डनीय छ। यस किसिमका कार्य गर्ने उपर ईआइसिटी नेपाल कानुनी उपचार खोज्न बाध्य हुने भएकाले सम्बन्धित सवैलाई सचेत हुन जानकारी गराइन्छ।

नयाँ