काठमाडौँ । भारतको नयाँदिल्लीका मुख्यमन्त्री अरविन्द केजरीवाल पुनः तिहाड जेल फर्केका छन् । मदिरा नीति घोटालाका कारण जेलमा रहेका आम आदमी पार्टीका नेता केजरीवाललाई अदालतले लोकसभा चुनाव प्रचारका लागि भन्दै गत १० मेमा अन्तरिम जमानत दिएको थियो । अदालतले पाँच वर्षमा एक पटक चुनाव आउने भन्दै जुन १ तारिख शनिबारसम्मका लागि जमानत दिएको थियो ।
उनी आइतबार साँझसम्म कुनै पनि हालतमा तिहाड जेलमा पुग्नैपर्छ । मदिरा नीतिले जेल पुगेका केजरीवालले जेलमै रहे पनि मुख्यमन्त्रीको पद छाडेका छैनन् ।
जेलभित्रै बसेर दिल्ली सरकार चलाइरहेका छन् । तर जेल जानुअघि उनले कार्यकर्ताहरुसँग देश बचाउन जेल जाने बताएका थिए ।
केजरीवाललाई प्रबर्धन निर्देशालय (ईडी) ले २१ मार्चमा जेल पुर्याएको थियो । पक्राउ परेको ३९ दिनपछि उनी मे १० मा चुनावका लागि रिहा भएका थिए ।
ईडीले नौ पटकसम्म सोधपुछका लागि बोलाउँदा नगएपछि पक्राउ गरेर लगेको थियो । उनले सर्वोच्च अदालतलाई जमानतका लागि अपीलसमेत गरेका छन् ।
तर अदालतले उनलाई छाड्न चार शर्त राखेको छ । ती शर्तहरुमा
१, उनी मदिरा नीतिका बारेमा कतै बयान दिने छैनन् ।
२, मुख्यमन्त्रीको कार्यालय र दिल्ली सचिवालय जाने छैनन् ।
३, सरकारी कामकाजमा दखल दिने छैनन् तथा कुनै फाइलमा हस्ताक्षर गर्ने छैनन् ।
४, साथै मदिरा नीतिसँग जोडिएका कुनै पनि साक्षीसँग कुराकानी गर्ने छैनन् ।
तर चुनावी प्रचारका क्रममा उनले अफबाह फैलाउने प्रयास धेरै नै गरेपछि अदालतले यसलाई गम्भीरपूर्वक लिएकोसमेत बुझिन्छ ।
