कांग्रेसका १० राज्मन्त्रीले खाए सपथ, कसले कुन् मन्त्रालय पाए ?

हाम्रा कुरा

प्रकाशित २०७३ मंसिर १५ बुधबार

काठाडमौं । प्रधानमन्त्री पुष्पकमल दाहालले सरकारमा नेपाली काँगेसका तर्फबाट १० जना राज्यमन्त्री थपेका छन्।

व्यवस्थापिका–संसद्मा सबैभन्दा ठूलो दल नेकाको साथ र सहयोगमा माओवादी केन्द्रका अध्यक्ष दाहाल साउन १९ गते प्रधानमन्त्री पदमा निर्वाचित भएका थिए। सरकार गठनको करिब ४ महिना पुग्नै लाग्दा प्रम दाहालले राज्यमन्त्री थपेर सरकार विस्तार गरेका हुन्।

नेकाले सम्हालेका दश मन्त्रालयमा नै राज्यमन्त्री थप गरिएको हो। प्रधानमन्त्री दाहालले नवनियुक्त राज्यमन्त्रीहरुलाई बुधबार प्रधानमन्त्रीको कार्यालयमा आयोजित विशेष समारोहमा पद तथा गोपनीयताको शपथ खुवाएका छन्।

शपथ लिनेमा राज्यमन्त्रीमा दीपक खड्का (खानेपानी तथा सरसफाइ मन्त्रालय), कञ्चनवादे श्रेष्ठ (उद्योग मन्त्रालय), सुरेन्द्रराज आचार्य(सिँचाइ मन्त्रालय), मिठू मल्ल (सहरी विकास मन्त्रालय), दिलीप खवास गच्छदार (श्रम तथा रोजगार मन्त्रालय), सीताराम महतो (भौतिक पूर्वाधार तथा यातायात मन्त्रालय) छन्।

त्यसैगरी दीर्घराज भाट (वन तथा भू–संरक्षण मन्त्रालय), सुवर्ण ज्वारचन (वाणिज्य मन्त्रालय), तारामान गुरुङ (स्वास्थ्य मन्त्रालय) तथा इन्द्रबहादुर बाँनिया (संस्कृति, पर्यटन तथा नागरिक उड्डयन मन्त्रालय) ले बुधबार आफ्नो पद तथा गोपनीयताको शपथ लिएका छन्।

नेकाका सभापति एवम् पूर्वप्रधानमन्त्री शेरबहादुर देउवाले आफ्नो पार्टीका तर्फबाट सरकारमा सहभागी हुने राज्यमन्त्रीको नामावली उपप्रधानमन्त्री एवम् गृहमन्त्री विमलेन्द्र निधिमार्फत मङ्गलबार प्रधानमन्त्री दाहाललाई दिएका थिए।

शपथ ग्रहण समारोहमा उपप्रधानमन्त्री एवम् गृहमन्त्री निधि, मन्त्रिगण, विभिन्न राजनीतिक दलका नेता तथा नेपाल सरकारका उच्च पदस्थ कर्मचारीको उपस्थिति थियो ।

नवनियुक्त राज्यमन्त्रीलाई बधाइ दिँदै प्रधानमन्त्री दाहालले जनताले छिटो परिणाम खोजिरहेकाले यही तथ्यलाई ध्यानमा राखेर कार्य गर्न आग्रह गरे। रासस