बस्यो सहकारी ठगी संसदीय छानबिन समितिको पहिलो बैठक [तस्बिर]
हाम्रा कुरा
प्रकाशित २०८१ जेठ २३ बुधबार
656
Shares
काठमाडौँ । सहकारी संस्था बचत रकम दुरुपयोग सम्बन्धमा संसदीय छानबिन विशेष समितिको पहिलो बैठक बुधबार बसेको छ ।
समितिको पहिलो बैठक सभामुखको उपस्थितिमा संसद भवन बानेश्वरस्थित शंकर हलमा बसेको हो । सहकारी ठगी प्रकरणमा प्रमुख प्रतिपक्ष दल नेपाली कांग्रेसले संसदीय छानबिनको माग गर्दै संसद अवरोध गरेपछि गत जेठ १५ गते एमालेका सांसद सूर्य थापाको संयोजकत्वमा संसदीय छानबिन समिति गठन भएको थियो ।
७ सदस्यीय समितिमा एमालेबाट सरिता भुसाल, कांग्रेसबाट सांसदहरु ईश्वरीदेवी न्यौपाने र बद्रीप्रसाद पाण्डे, माओवादीबाट लेखनाथ दाहाल, रास्वपाबाट शिशिर खनाल र राप्रपाबाट ध्रुवबहादुर प्रधान सदस्य रहेका छन् ।
समितिलाई तीन महिनाको समय दिएर ४ बुँदे कार्यादेश दिइएको छ । गृहमन्त्री रवि लामिछाने सहकारी ठगी प्रकरणमा मुछिएपछि कांग्रेसले छानबिनका लागि माग गरेको हो ।
रविको नाम प्रत्यक्ष नलेखिएको भए पनि उनले प्रयोग गरेको सहकारीको छानबिन हुने भएसँगै उनी स्वतः मुछिने छन् । यद्यपि यसअघिका छानबिन समितिका निचोड कार्यान्वयनमा एमाले अध्यक्ष केपी शर्मा ओली प्रधानमन्त्री भएका बेलामा ढिसमिस गराउने खराब प्रवृत्ति बसालेकाले यसको निश्पक्ष छानबिन र कार्यान्वयन पक्ष सही बाटोमै जानेमा शंका कायम छ ।
