काठमाडौँ । कोपा अमेरिकाको पहिलो सेमिफाइनल खेलमा अर्जेन्टिना र क्यानडा भिड्दै छन् । खेल नेपाली समयअनुसार बुधबार बिहान ५ः४५ बजेदेखि शुरु हुँदैछ ।
पहिलो पटक कोपा अमेरिकाको सेमिफाइनलमा पुगेको क्यानाडाले क्वार्टरफाइनलमा भेनेजुएलालाई पेनाल्टी सुट आउटमा ४–३ गोल अन्तरले पराजित गरेको थियो ।
क्यानाडा समूह चरणमा अर्जेन्टिनासँग एकै समुहमा रहेको छ । समूह चरणको खेलमा क्यानाडा अर्जेन्टिनासँग २–० गोल अन्तरले पराजित भएको थियो ।
त्यस्तै अर्जेन्टिनाले क्वार्टरफाइनलमा इक्वेडरलाई पेनाल्टी सुट आउटमा ४–२ गोल अन्तरले पराजित गर्दै सेमिफाइनलमा पुगेको हो ।
अर्जेन्टिना ३७औँ पटक कोपा अमेरिकाको सेमिफाइनल खेलिरहेको छ । डिफेन्डिङ च्याम्पियनसमेत रहेको अर्जेन्टिनाले सबैभन्दा बढी १५ पटक कोपा अमेरिकाको उपाधि जितेको छ । अर्जेन्टिना र उरुग्वे दुवैले १५–१५ पटक कोपाको उपाधि जितेका छन् ।
अर्जेन्टिना र क्यानाडाबीच अहिलेसम्म केवल दुई खेलमात्र भएका छन् । जसमा दुवै खेल अर्जेन्टिनाले जितेको छ ।