काठमाडौँ । प्रधानसेनापति बन्ने रोलक्रममा रहेका रथी अशोकराज सिग्देललाई जन्ममितिमा विवादमा प्रमाण नपुगेको भन्दै बढुवाका लागि बाटो खोलिदिएको छ । 

४५ औँ प्रधानसेनापतिको रोलक्रममा रहेका सिग्देलले शैक्षिक योग्यता र नागरिकताका प्रमाणपत्रमा कीर्ते गरेर जन्ममिति सच्याएको भन्दै सर्वोच्च अदालतमा परेको निवेदनमाथि सर्वोच्चले साउन १३ गते (आइतबार) प्रमाण अभाव भन्दै रिट दरपीठ गरेर बढुवाका लागि बाटो खोलेको हो ।  

प्रधानसेनापति प्रभुराम शर्मा यही साउन २६ गतेबाट घर बिदामा बस्दैछन् । उनी भदौ २५ गते अनिवार्य अवकाशमा जाँदै छन् ।

सिग्देलबारे अख्तियार दुरुपयोग अनुसन्धान आयोगमा मंसिर ४ गते उजुरी परेको थियो ।  

उजुरीबारे छानबिन गरेर जानकारी गराउन अख्तियारले ७ गते रक्षा मन्त्रालयलाई निर्देशन दिएको थियो । 

तर रक्षाले यो विषय अख्तियारलाई जानकारी दिएको छैन । उता सर्वोच्चमा परेको निवदेन भने दरपीठ भएको छ ।

वास्तविक जन्म मिति २०२१ साल चैत १९ गते भएका सिग्देलले शैक्षिक योग्यताको प्रमाणपत्र र नागरिकताको प्रमाणपत्रमा २०२३ माघ १९ गते बनाएको स्रोतको दाबी छ । 

२०३९ सालको एसएलसीको प्रमाणपत्र, २०४० सालमा सुपिङ क्याम्पसमा भर्ना हुँदाको अभिलेख र त्रिभुवन विश्वविद्यालयको अभिलेखमा उपरथी सिग्देलको जन्ममिति २०२१ चैत १९ गते रहेको उजुरीमा देखिन्छ । 

२०४० असोज ९ गते जिल्ला प्रशासन कार्यालय रुपन्देहीबाट लिएको नागरिकताको प्रमाणपत्रमा उमेर ‘१९ वर्ष’ र ढड्डामा ‘२०२१ साल’ उल्लेख छ । 

उपरथी सिग्देलले २०५८ जेठ ८ मा जाजरकोट जिल्लाबाट नागरिकताको प्रतिलिपि लिँदा कीर्ते गरेको स्रोतको दाबी छ । 

सिग्देलले निवेदन दिएपछि २०४३ साउन ३१ गते जन्म मिति परिवर्तन गरिएको त्रिभुवन विश्वविद्यालय परीक्षा नियन्त्रण कार्यालयको चलानी नम्बर १४६७ को पत्रमा उल्लेख छ ।

त्यस्तै २०७६ साउन ३० गते त्रिभुवन विश्वविद्यालयको अभिलेखमा उल्लिखित जन्ममिति २०२१ चैत १९ लाई केरमेट गरेर २०२३ माघ १९ गते बनाएको विषयमा अनुसन्धान हुनुपर्ने उजुरीमा उल्लेख छ ।  

सिग्देलले एसएलसीको प्रमाणपत्रको प्रतिलिपि १२ नोभेम्बर २०१८ र १३ नोभेम्बर २०१८ मा लिएको देखिन्छ । त्यस्तै त्रिभुवन विश्वविद्यालयको रजिस्ट्रेशन कार्डको प्रतिलिपि १५ अगस्ट २०१९ मा लिएको देखिन्छ ।   
 
प्रमाणपत्र कीर्ते गरेको विवादपछि प्रधानसेनापतिको रोलक्रममा रहेका रथी ताराध्वज पाण्डेले गत कात्तिक २४ गते पदबाट राजीनामा दिएका थिए । 

उपरथी पाण्डेको जन्ममिति विवाद आउँदा पनि शुरूमा जंगी अड्डाले प्रतिरक्षा गर्दै विज्ञप्ति निकालेको थियो । 

तर अख्तियारले छानबिनका लागि निर्देशन दिएको पत्र रक्षा मन्त्रालय हुँदै सैनिक मुख्यालय पुगेपछि रथी सीताराम खड्का नेतृत्वको समितिले छानबिन गरेको थियो । त्यसपछि पाण्डेले राजीनामा दिएका थिए । 

अहिले सिग्देलको जन्ममिति विवाद बारे पनि जंगी अड्डाले खण्डन गरेको छ । नेपाली सेनाले गत साता पत्रकार सम्मेलन गरेर बलाधिकृत रथी सिग्देलको नागरिकतामा जन्ममिति विवाद नरहेको प्रस्टीकरण दिएको छ । 

पत्रकार सम्मेलनमा सेनाका प्रवक्ता गौरवकुमार केसीले रुपन्देहीमा शुरुमा लिएको नागरिकता प्रमाणपत्र, जाजरकोटबाट पछि लिएको प्रतिलिपि तथा उनको शैक्षिक प्रमाणपत्रमा उल्लेखित जन्ममितिमा कुनै विवाद नभएको स्पष्ट पारेका थिए ।