वर्तमान राष्ट्रपति सन्दू नै दोस्रो कार्यकालका लागि निर्वाचित

हाम्रा कुरा

प्रकाशित २०८१ कार्तिक १९ सोमबार

मोल्दोभा । मोल्दोभाकी वर्तमान राष्ट्रपति मइया सन्दूले ५४.१९ प्रतिशत मत प्राप्त गरी देशको राष्ट्रपतीय निर्वाचनमा अग्रता लिएकी छिन् ।

मोल्दोभाको केन्द्रीय निर्वाचन आयोगले ९७.८ प्रतिशत मत गणना गर्दासम्म दोस्रो चरणको निर्वाचनबाट राष्ट्रपति सन्दूले ५४.१९ मतसहित अग्रता कायम गरेकी हुन् ।

राष्ट्रपतिका मुख्य दाबेदार पूर्व महान्यायाधिवक्ता अलेक्जेन्डर स्टोयानोग्लो ४५.८१ प्रतिशत मत प्राप्त गरेका छन् ।

मत परिणाम हेर्दा ईयू निकट राष्ट्रपति सन्दूको विजय सुनिश्चत भएको छ । यद्यपि अन्तिम मतपरिणाम आउन बाँकी छ ।

निर्वाचनलाई ईयू निकट उम्मेदवार सन्दु र रूस निकट स्टोयानोग्लाबीचको प्रतिस्पर्धालाई इयू र रूस दुवैले प्रतिष्ठाको विषय बनाएका छन् ।

आगामी चार वर्षे कार्यकालका लागि हुने निर्वाचनमा मतदानपछि राष्ट्रपति सन्दूले भनिन्, “मैले मतदान गरेँ । मलाई विश्वास छ हाम्रा मतदाताले देशको लागि राम्रो मार्ग छनौट गर्नेछन्। अहिले पहिलेभन्दा अझ बढी एकताका साथ हामी देशको शान्ति र स्वतन्त्रताको पक्षमा उभिनुपर्छ।”

पार्टी अफ एक्सन एण्ड सोलिडारिटीको पूर्व नेताको रूपमा उनले पहिलो चरणको चुनावमा सबैभन्दा बढी ४२ प्रतिशत मत प्राप्त गरेकी थिइन् भने मोल्दोभाको समाजवादी पार्टीद्वारा समर्थित स्टोयानोग्लोले करिब २६ प्रतिशत मत पाएका थिए । स्टोयानोग्लोले अपेक्षा गरिएभन्दा अत्यधिक बढी मत पाएका थिए ।

सन्दूले ‘स्वतन्त्र, स्थिर, समृद्ध मोल्दोभा’ प्रति आफ्नो प्रतिबद्धता व्यक्त गर्दै देशको युरोपेली सङ्घ (ईयू) सँग एकीकरणको मार्गको लागि आफ्नो समर्थनमा जोड दिइन् ।

अक्टोबर २० मा भएको राष्ट्रपतीय चुनावपछि, मोल्दोभामा शीर्ष दुई उम्मेदवारबीच दोस्रो चरणको निर्वाचन भएको हो ।

पहिलो चरणमा राष्ट्रपतिपदको दौडमा रहेका ११ उम्मेदवारमध्ये कसैले पनि ५० प्रतिशत वा एक मतको रूपमा परिभाषित मतको पूर्ण बहुमत प्राप्त गर्न सकेका थिएनन् ।