पोखरा । राष्ट्रिय स्वतन्त्र पार्टी (रास्वपा) सभापति रवि लामिछानेकै कम्पनी भएको प्रमाणित हुँदै गएको छ । लामिछाने सहकारी ठगी, संगठित अपराध र सम्पत्ति शुद्धीकरणमा पक्राउ परेका अवस्थामा रास्वपाका नेताहरुले निष्पक्ष छानबिन गरी न्याय दिन अदालतलाई अनुरोध गर्नुको सट्टा सरकारको प्रतिशोधमा पक्राउ गरेको भनेर आरोपलाई ढाकछोप गर्दै आएका छन् । 

उनीहरुले शनिबारमात्रै पार्टीको बैठकमा रवि कुनै हालतमा दोषी नभएको भन्दै प्रतिशोधका कारण पक्राउ परेको भन्दै रिहा नभएसम्म आन्दोलन सशक्त पार्ने निष्कर्ष निकाले ।

उनीहरुले रविलाई छानबिन सकिएर दोषमुक्त भएपछि पुनः सभापतिको पद सम्हाल्ने गरी कसैले पनि कार्यबाहक सम्हाल्ने आँट गर्न सकेनन् । यो निर्णय पनि हुन सकेन । 

हुँदा हुँदा दोस्रो चरणको आन्दोलनको थालनी गर्दै पोखरामा उपसभापति डोलप्रसाद अर्याल (डीपी) ले रवि लामिछाने ज्युँदो रहेसम्म रास्वपाको सभापति रहने बताएर रास्वपालाई रविको निजी कम्पनी जस्तो बनाइदिए । 

सभापति लामिछानेको रिहाइको माग गर्दै आइतबार पोखरामा आयोजित विरोध कार्यक्रममा बोल्दै अर्यालले तत्काल कसैले पनि कार्यबाहक नपाउने संकेत गरे । उनले कार्यक्रमलाई सम्बोधन गर्दै भने, ‘रवि लामिछाने ज्युँदो रहेसम्म रास्वपाको सभापति उहाँ नै हो । यसमा कार्यबाहक सभापति कसले पाउँछ, कसले पाउँदैन त्यो गौण कुरा हो ।’

कार्तिक २ गते साँझ काठमाडौँबाट पक्राउ परेका रविलाई कास्की जिल्ला प्रहरीको मातहतमा हिरासतमा राखिएको छ । उनीमाथिको अनुसन्धान जारी रहँदा कास्की जिल्ला अदालतले म्याद  थप गर्दै आइरहेको छ । 

तर अहिलेसम्म पार्टीले कसैलाई पनि कार्यबाहक तोक्ने आँट गरेको छैन । 

पार्टीमा डीपीसँगै स्वर्णिम वाग्ले उपसभापति छन् । रास्वपाको विधानमै सभापतिले तोकेका वा ज्येष्ठ उपसभापति मध्येबाट कार्यबाहक तोक्ने विधानमा व्यवस्था भए पनि अहिलेसम्म पार्टीले कसैलाई कार्यबाहक दिएको छैन । त्यतिमात्र होइन रविलेसमेत कसैलाई कार्यबाहक दिने आँट गरेका छैनन् । 

स्पष्टै छ कि रवि सजिलै छुट्ने वाला छैनन् । उनी कास्की जिल्ला प्रहरीबाट छुटे पनि रुपन्देही प्रहरीले पक्राउ पुर्जी जारी गरिसकेको छ । काठमाडौँ जिल्ला प्रहरीलेसमेत सहकारी ठगीमा अनुसन्धान गरिरहेकाले उसलेसमेत पक्राउ पुर्जी जारी गर्न सक्ने अवस्था छ । 

हुनत केन्द्रीय समिति बैठकको अध्यक्षता डीपीले नै गरे । तर उनले चाकडी गरिसकेका छन् कि ज्युँदो छन्जेल सभापति रवि नै हो । 

रवि जेल पर्दा सहकारी सहितका विभिन्न प्रकरणमा आफूहरु पनि तानिने चिन्तामा रास्वपाका नेताहरु रहेको बुझ्न सकिन्छ । 

तसर्थ उनीहरुले पहिलो चरणबाट पार नलागेपछि दोस्रो चरणमा सशक्त भएर उत्रने चेतावनी दिइसकेका छन् ।