काठमाडौँ । नेपाली कांग्रेसका महामन्त्री गगनकुमार थापाले पछिल्लो समय बढेको जहाजको भाडा घटाउने सम्बन्धमा गम्भीर पहलकदमी गरेका छन् । महामन्त्री थापाले कांग्रेस सांसद सञ्जय गौतमसँग बिहीबार संस्कृति, पर्यटन तथा नागरिक उड्डयन मन्त्रालयमा गएर मन्त्री बद्री पाण्डे, मन्त्रालयका सचिवलगायत मन्त्रालयका अधिकारीहरू, नागरिक उड्डयन प्राधिकरणका महाप्रबन्धक, नेपाल वायुसेवा निगमका अधिकारी, अन्य सम्बन्धित प्रतिनिधिहरूसँग छलफल गरी हवाई भाडामा भएको अस्वाभाविक वृद्धि र कोरिया जाने श्रमिकको हवाई भाडादरको समस्या समाधानबारे गम्भीर ध्यानाकर्षण गरेको बताएका हुन् । 

उनले हवाई भाडा सम्बन्धमा तीन बुँदामा समस्या र समाधानको गाँठो फुक्नेबारे छलफल भएको उल्लेख गरेका छन् । उनले आफूहरुले गरेका ध्यानाकर्षणमा मन्त्रलायले काम गर्ने प्रतिबद्धता जनाएकोसमेत उल्लेख गरेका छन् । 

सो क्रममा मन्त्री पाण्डेले तुरुन्त काम हुने गरी प्रक्रिया अगाडि बढाउने बताएकोसमेत उल्लेख गरेका छन् । 

यसो लेखेका छन् थापाले सामाजिक सञ्जालमा-
हिजो संस्कृति, पर्यटन तथा नागरिक उड्डयन मन्त्रालयमा !
मा. सञ्जय गौतम र मैले, माननीय मन्त्रीज्यू, सचिवज्यू, लगायत मन्त्रालयका अधिकारीहरू, नागरिक उड्डयन प्राधिकरणका महाप्रबन्धक, नेपाल वायुसेवा निगमका अधिकारी, अन्य सम्बन्धित प्रतिनिधिहरू सँगको छलफलमा मूलतः दुई विषयमा हामीले गम्भीर चासो राख्दै ध्यानाकर्षण गराएका छौँ।
१. हवाई भाडामा भएको अस्वाभाविक वृद्धिको सम्बन्धमा:
क)अहिले त्रिभुवन अन्तर्राष्ट्रिय विमानस्थलमा भइरहेको निर्माण कार्यको कारण फ्लाइटको सङ्ख्या कम भएको र यसको कारण भनेर अन्तर्राष्ट्रिय हवाई भाडा दर अस्वाभाविक रूपमा वृद्धि भएको छ। जसको सिधा असर आम मानिसमा परेको छ। हामीले यो सम्बन्धमा मन्त्रालयको धारणा सुन्यौ। यसलाई सुधार गर्न के काम भइरहेको छ भन्ने जानकारी लियौ।
ख) डिसेम्बर महिना बाट धेरै सुधार हुन्छ भन्ने कुरा आएपनी त्यसपश्चात्को हवाई भाडा दर पनि महँगो नै रहने अवस्था छ। यसको समाधानको लागी सबै उपायहरू लगाएर भाडदारमा भइरहेको अनियमितता लाई चेक गर्न आवश्यक रहेको बुझाउँदै हामीले हाम्रा सुझाव दिएका छौँ।
ग) यसरी विमानस्थलमा हुने निर्माण कार्यकै कारण देशको हवाई यातायात र भाडा दर प्रभावित हुनेभएकोले अहिले भइरहेको विमानस्थल निर्माणका कामहरूलाई 'के-कस्तो उपायहरू लगाएर थप गतिशील बनाएर कसरी निर्माणको अवधि घटाउन सकिन्छ? जसले गर्दा निर्माण अवधि घट्न सक्छ।', भन्ने हाम्रो चासोको विषयमा मन्त्रालयले काम गर्ने प्रतिबद्धता जाहेर गरेको छ, जुन सराहनीय छ। 
२. कोरियामा जाने श्रमिकहरू महँगो हवाई-भाडदारका कारण एकदमै ठुलो मारमा परेका छन्। नेपाल वायुसेवालाई नै कोरिया उडान गराएर हुन्छ वा अन्य विकल्प खोजेर हुन्छ जसरी पनि यो समस्या समाधान गर्नुपर्छ भन्ने धारणा राख्यौँ।  यस सम्बन्धमा मैले अध्ययन गरेर, अन्तरक्रिया गरेर लिएको सबै कुराको जानकारी गराएको छु। यसका लागी मन्त्रालयले परराष्ट्र मन्त्रालय, श्रम मन्त्रालय, EPS,  नेपाल वायुसेवा निगम, नागरिक उड्डयन प्राधिकरण लगायत सम्बन्धित सबै निकायसँग एकै ठाउँमा बसेर, समन्वय गरी तत्काल  निचोडमा पुगेर कार्यान्वयनमा लिएर जानुपर्नेछ। यसमा मन्त्रीजीले 'तुरुन्त काम हुने गरी प्रक्रिया अगाडी बढाउँछु' भन्ने कुराको विश्वास दिलाउनुभएको छ।