महाराष्ट्रमा कसको सरकार बन्ला ? यस्तो छ एग्जिट पोलको आँकडा

हाम्रा कुरा

प्रकाशित २०८१ मंसिर ५ बुधबार

काठमाडौँ । भारतको महाराष्ट्रमा विधान सभा निर्वाचन सम्पन्न भएको छ । बुधबार साँझ ५ बजेसम्म महाराष्ट्रका २८८ सिटका लागि भएको मतदानमा ५८.२२ प्रतिशत भोट खसेको थियो ।

मतदानका क्रममा बीड विधानसभा क्षेत्रमा निर्दलीय प्रत्यासी बाला साहब शिन्देको मतदान केन्द्रमा नै हृदयाघातबाट मृत्यु भएको छ ।

मुख्यमन्त्री एकनाथ शिन्दे परिवारका साथमा ठाणेमा मतदान गर्न गएका थिए ।

यसको नतिजा आगामी शनिबार २३ नोभेम्बरमा आउने छ । कसको भविष्य के होला भन्ने कौतुहलबीच विभिन्न एग्जिट पोलको आँकडा पनि बाहिर आएको छ ।

सत्तारुढ भारतीय जनता पार्टी (भाजपा) नेतृत्वको महायुति गठबन्धनमा भाजपा, शिवसेना र राष्ट्रवादी काङ्ग्रेस पार्टी छन् भने विपक्षी महाविकास अघाडी (एमभीए) मा काङ्ग्रेस, शिव सेना (यूबीटी) र राकांपा (शरदचन्द्र पवार) छन्।

म्याट्रिजको एग्जिट पोलका अनुसार महाराष्ट्रमा सत्ता गठबन्धनको महायुतिको १५० देखि १७० सिट आउन सक्नेछ । त्यस्तै एमबीएको ११० देखि १३० सिट र अन्यको बढीमा १० सिटसम्म आउन सक्ने अनुमान गरिएको छ ।

चाणक्य स्ट्राटिजिजको एग्जिट पोलका अनुसार महायुतिले १५२ देखि १६० सिट जित्न सक्नेछ । एमबीए गठबन्धनले १३० देखि १३८ सिट जित्ने अनुमान छ । बाँकीले ८ सिटसम्म जित्ने अनुमान गरिएको छ ।

जेभीसीको एग्जिट पोलअनुसार महायुतिले १५९ सिट, एमबीएले ११६ सिट र बाँकीले १३ सिट जित्ने अनुमान गरिएको छ ।